بعدي و الله '! قوووووووويه‎

[أم يـــــزن]

تنهد محمد بشدة و هو يقود السيارة و بجانبه زوجته .. وسألها ' شفتي ذيك اللبنانية اللي في المحل وشلون تحاكي الرجال اللي معها؟؟ تهقينه رجلها ولا مخاوتيه؟؟

ردت :إلا رجلها شايفته يوم يلبس الولد جزمته بعد ما قاس عليه البنطلون

.
تجاهل ملاحظتها بالنسبه للتلبيس و تسائل بغباء:
وشلون؟؟
وش قصدك ..وشلون؟؟
ماسمعتيها وهي تقول شوف هالقميص حبيبي لونه حيصير يعقد لما تلبسه مع الجينز الكاكي من شان خاطري جربه يا روح آلبي.
وش يضركن يا السعوديات لو تسوون مثل هالأجنبيات..لطافة و شياكة وحكين يالله من فضلك

أولا :لو أقول لك ياحبيبي في المحل (وطيت رجلي )..

ثانيا: الحريمه لابسه بنطلون جينز محكك ماشفت فيه أي بادرة شياكه..

و بعدين تعال ، وراك خليت كل شي و ماسمعت إلا هالكلمتين الزينات.. ما شفته ما شاء الله وهو ياما شال البنية من العربية ياما حطها فيها ..ياما قاس اللبس على الولد ياما لبسه جزمته ..ويوم خلصت الحريمة منقية قال هاتي اللي بإيدك حبيبتي من شان وديهم لعند الكاشيير...مهوب مثلك إن كانك ذاك اليوم رايق و ذابحتك الرومانسية قلت إذا قضيتوا تراي واقف برا أحتريكم..<~اليمه

ياعمري وقلبي أنت تبي من يقول لك ياحبيبي و ياروح ألبي..ما يحصل ..اللي أوله شرط آخره نور ..شكلك نسيت يوم تقول لي أيام الملكة .ترى إذا قلت لك يا حلوة وحنا نتناقش لا تصدقين ..أنا دايم أقولها من باب السخرية و التهكم و لا أقصد فيها المدح إطلاقا..ما أقول إلا الله كلن يخليه لعميره و أهيله ..والله لا قايلة لك يا عمري ولا يا روحي.. الحب أحبك ..مانيب كاذبه بس هالكلمات يالله أقولها لعيالي إذا صخنوا... [ حقيقة مع اني أبنه سعودي و زوجة سعودي و أم سعودي و في يوم ما بإذن الله سأكون (جدة ) سعوديين و أفتخر بهم جميعا ]
إلا أن الشغلة فيها بجاحة..<~(طمع) شوي . لا والله مهوب شوي إلا ' بجاحة بلا حدود '

* أنت تبي زوجتك تقول لك كلام محبة و تعطيك عيونها وأنت في نفس الوقت ماتبي تعطيها عيونك ولا حتى نظارتك.

صراحة ...أشك أن السالفة سالفة أنكم بحاجة لكلام ناعم و ألقاب فقط (وأدري أن كل الموضوع حجة لتبررون به حبكم للأجنبيات الجميلات فقط ).. ولا هذي فوزية الدريع طول برنامجها وهي يا عيوني و ياعيوني ..' كن منكب فيهن رماد 'و ما شفناكم مقابلين برنامجها.. القضية قضية وش شكل قائل الكلمة ؟؟

* تبي زوجتك تحترمك وتغنج لك و تقول لك سم ولبيه و انت ردك عليها "هآآآاه ؟؟بمعنى نعم " أو وش هنا ؟؟
أنا أعرف ولد في المتوسط إذا ناداه أحد رجال او أمرأه رد ' سم ' ما يدري ان المرأة يقال لها 'سمي ' ليس لأن عنده مشكلة في القواعد و المذكر و المؤنث و لكن لأنه و بكل بساطة ما قد سمع رجال من اللي حوله يقول لحرمة << سمي >>

يا حليلك يالرجل السعودي عجيب وغريب و جرئ
*غريب ..تبي زوجة أقدامها ناعمة و ركبها بيضاء وانت رجلينك كن الوحدة محراث تنور ..و اقدامك الشطب الواحد ممكن توزي فيه سكينة سويس ارمي

*عجيب.. تبي زوجة تلبس جينز و تتشيك لك بتنورة وانت أربعة و عشرين ساعة صيف و شتاء تدير و تاكل و تنام في اللبس السعودي الرسمي فنيلة بيضاء نص كم و سروال سنة .. ومهما شرت لك المسكينة من بيجامات من تخفيض دبنهامز أو ماركس و سبنسر ما لبستهن (هي تشتري مخفضة ليس تقليل من قيمتك و لكن لأن الأمل ضعيف في انك تلبسهم )

ياشباب!! ( الشياب توو ليت ماعاد فيه أمل يتعدلون ) أنا متاكدة أن مافيه أنثى بتقول لها ' حبيبتي' و ترد عليك بجفاف ..الأنثى معطاء جرب تعطيها حنان و بترد لك أكثر .

الشي الثاني يا أبني لو أنت تشيكت و لبست داخل البيت مستحيل أم العيال بتجلس في خلاقين أو لبس أقل من اللي انت لابسة ..أصلا طبيعة الأنثى غيور و بتجاريك في لبسك تلقائيا ياإما حتى ترتقي لمستواك أو عشان ما تعرس.

ومثل ما يقولون الأمريكان " إت تيكس تو"

ذكرت سالفة طريفة و هي سالفة النجدية << أم علي>> اللي جتها جلطة عندما قال لها أبو علي ياعيوني بعد 40 سنه من الحياة الزوجية ماكانت تسمع فيها الا" ياهيش و يامره ".. و عندما سألوا أبو علي عن سبب التغيير المفاجئ ..أجاب :
بلاها والله بقرة ولا هل يعقل أني بعد 40 سنه أبي أقولها ياعيوني ؟؟ ماطرت علي ..بس ذا الخبلة أقول لها ياعيوني ذبحها اللقاح حق االنخل وهي اللي طارت بالعجة و حسبتني أنهبلت و بديت أقول لها يا عيوني ..الله ياخذ الروح قبل المكروه

ههههههههههههههههههههه
قوويه

منقووووول

[يحيى محمد الزهراني]

شكلك مقهوره والانهيار قادم

[غرم الله المرشد]

اشكر الزميلة ام يزن
على هذا الحديث المريح للنفس

هههههههههههههههههههههه
اه بطني تقطع بطني من كثر ماضحكت

اصلا الحرمة السعودية ضد الرومانسية
والرجل اذا خلص من الفواتير والاقساط والديون ومصاريف الورعان
يكون توفي دماغيا

ارضنا صحراء وجبالنا وعره واكلتنا كبسه وكلامنا جاف
بالله من وين تجينا الرومانسية

[مخاوي النهار]

مشكووووور

[جسد بلا قلب]

يا حليلك يالرجل السعودي عجيب وغريب و جرئ
*غريب ..تبي زوجة أقدامها ناعمة و ركبها بيضاء وانت رجلينك كن الوحدة محراث تنور ..و اقدامك الشطب الواحد ممكن توزي فيه سكينة سويس ارمي


والله القهر كل واحدة تناظر الرجال اللى معاها متعلم والا( لا) بعدين تحكم .

لك على كـل حــــال تــــــسلــمـــيــن يـــابـــعــد حيـــي ........ههههه

[المووووج]

اااااااااااااااااااااااه يابطني قويه سروال السنه لاتنسين بعد الصلعه

[الصغير1]

نقل مميز وراقي
اعتقد اختي الغاليه ان التعميم هنا خطاء لدينا اشخاص يعرفون يديرون الحياة الزوجيه بطريق صحيحه واعتقد ان الانسان الذي يعطي سوف ياخذ صحيح فيه رجال يشتكون من عدم تدليل ازواجهم لهم والعكس صحيح انني اتسأل لماذا لايبداء الطرف الثاني ويكسب الاجر
بالكلمه الحلوه والمعامله الحسنه عموما اسأل الله ان يصلح شأن الجميع
تقبلي احترامي

[القرناس]

افضل عبارة مرت بالموضوع

كلمة (قوووووووووووية) طالعة من شارع التلفزيون

باقي الموضوع نقول لك يعطيك العافية

[طوق الياسمين]

تدرين عاد يا ام يزن من القوية ؟
والله انها أنتي .. يوم تنزلين هالموضوع في ذا



اسمعي يوخيتي >>> اندمجت مع اللهجه النجدية بالقصة
اعتقد مؤلفة الموضوع وليس ناقلته .. قد كتبت هذا الموضوع الفكاهي لكنة ً والهادف مضمونا ً قبل 11 : 4 سنوات
لأن مجتمعنا دخلت عليه ثقافة في السنوات الاخيرة تبشر بالخير لكلا الزوجين .!
اصبح امساك الزوج بيد زوجته في الاسواق والمنتزهات امر وارد
كذلك اهتمامه بملابسه والتنويع مابين التي شيرت والبدي وبنطلون الجينز والآخر برمودا نراها كثيرا في الاماكن العامة
وكثيرات من النساء في زماننا حين نراهن نكاد لا نفرق بين متزوجة وفتاة من حيث اهتمامهن بمظهرهن وقوامهن
فلم يعد الاهتمام بالاطفال يعيق اهتمامها بنفسها وبيتها و"التكشخ" لزوجها
حتى في مكالمتها لزوجها لا تخلو المحادثة السريعة من "حبيبي / عيوني" ، هذا اتيكيت بين الزوجين رائع .!
هذا وداخل البيت اعتقد اكثر .. واسأل الله أن يصلح شأن الجميع


للمؤلفة / قري عينا ً فالدنيا بخير .!
ولك ياناقلة / ألف شكر لك

وننتظر ابداعك .

[بعيدة المدى]

صدق غرم الله

اقتباس: ارضنا صحراء وجبالنا وعره واكلتنا كبسه وكلامنا جاف بالله من وين تجينا الرومانسية

فأنا انصح بتنويع الموارد البشريه
يعنى الوحدة تاخذ واحد لبناني او تركي
يكون متعلم الرومنسيه من عند اهله
مايحتاج يأخذ رخصة من عندنا
ومشكورة يا ام يزن
وجبتيها على الجرح