~][إيــاد مــدنــي ,, تـلفـزيـونـك هبّـل فينآ][~

[ملف ضآيع]

[align=center]صبآح الخيــر \ مسآء الخيـر

حيآ اللـه كـل واحـد بأسمـه .. واللي ماعنده اسم الله يحييه باسم أخوه

يا جماعة الخير يالمسلمين يا النشامى .. تلفزيوننا العزيز من تالي مهوب صاحي أبد ..
قسم بالله فيه بلاوي

في السآبـــق ..

كانت الاعلانات التجارية يجيبون حريم متسترات محتشمات شوي قسم بالله ويلبسن دسوس .. ويقعدن يسولفن ويتميصلن ثم تقول وحده لخويتها : ماجربتي المنتج الفلاني ؟ تقول خويتها : لا واللهي ماجربتهوش .. تقوم خويتها تعطيها المنتج اللي يتكلم عنه الاعلان ثم بعدين تجي تشكرها وتقول فعلاً منتج مهوب صاحي فادني كثير وينتهي الاعلان ويا دار مادخلك شر ..:


الحين لا .. الحين الوضع اختلف .. إياد مدني اكبر من هالاعلانات

إذا ما طقت الحرمه الجنز .. وفلت الشعر .. وقامت تتدلع وتمشي باالكريم أو الشامبو وتهز عمرها .. مايعتبر هذا إعلان عند أبو مدني

\
\
\

أنا أذكر أن تلفزيوننا في السابق ينقلون مباراة كأس العالم .. يقوم المخرج ياخذ فرة على الجمهور الحاضر للمباراة أو يتابع الأمواج اللي يسويها الجمهور.. ومن أول ظهور لمرأة متبرجه تنحاس الشاشه فوق حدر و النقل يتوقف ويحطون صورة ثابته على برج التلفزيون على بالهم منظر .. ثم تسمع محمد خيري يقول بصوت مقتضب : عذراُ للخلل الفني وسنعود لمواصلة البث بعد قليل <<< شكلهم راحوا يطقون المخرج الأوروبي ههههههه

لااااااااا الحين الوضع اختلف عند إياد باشا .. :-

من كان يصدق يا جماعة الخير أننا راح نشوف في يوم من الايام نور الشريف او أحمد زكي في أحد أفلامهم السينمائية على شاشة قناتنا الأولى ؟


نوووور !
نور الشريف يا أبو مدني ؟
نور الشريف اللي ماخلا ولا شيء في أفلامه الا سـواهـا تقوم ترزه في قناتنا يامدني ؟ أنهبلت يا ابو الشباب


أجحدوا اللي فوق كله .. وكلموني عن مشهد قبل أسبوع .. يا هو مشهد ..
هبال يا مدني قسم بالله هبال :

\
\
\

جالس أنا والوالد في جو مفعم بالروحانية الأسرية .. في جو تملأه السكينة والوقار والحنان الأبوي .. وقاعدين نتفرج على القناة الأولى :-

"يبه أصب لك شاهي ؟ .. لا وانا ابوك توني متقهوي عند واحد .. لا يبه خلني أصب لك بياله على شاني ..بس ياولدي مالي فيه الحين والله .. ! وش اللي مالك فيه لا والله ان تشرب من يدي الجدا تراها بياله.. لعنتن تلعنك وانا أبوك وراك حقنه أقول لك ماأبي شي !"<<< طاح وجهه

المهم ..شوي إلا وجابوا فلم أمريكي .. طبعاً أنا ما تدخلت ولا غيرت القناة من باب تجديد الثقه في إياد مدني وانه ماراح يخذلني قدام الوالد بمشاهد ساخنه ..

بدأ الفلم .. البطلة ممثلة شقراء كل الزين فيها . . مرة بنطلون مرة برمودا مرة تنورة قصيرة وانا مازلت صامد ولا أفكر أغير القناة .. يخرب بيتك يا مدني على بيت اللي يثق فيك شوفوا اللي حصل :

البطلة دخلت الحمام أكرمكم الله .. أنا اللي في راسي أن المشهد راح ينقطع .. لكن للأسف أستمر المشهد والكاميرا لحقت الحرمة وسط الحمام وأبو الشباب مدني لحقهم بعد ولا قطع الصورة


موقفي الأن ضعيف لو غيرت القناة راح يشك الوالد إني ألعب عليه وان هالقناة مهيب مظبوطة وعلى باله قافطني .. خليت الأمور وانا أرجي خير واقول ماراح يطول المشهد أكثر ..

البطلة مصختها يا جماعة الخير .. قامت وترست البانيو مويه ورغوة صابون .. ومازال إبااد مدني وتلفزيونه العزيز حاضرين وحالفين الا يورونا البطلة وهي تتروش

دخل عليها في الحمام رجال .. قامت تضحك هي وياه والكاميرا ثابته على رقبة ...

جاء الرجال وعطاها سماعة التلفون وهي في البيانو .. قصدي البانيو ! لعنبو دارك يا مدني انت وأفلامك خليتني أخربط في الحتسي المهم أنتهى المشهد الحميم في قناتنا الأولى !

\
\
\

هنا الوالد ألتفت علي وقد فقد أعصابه وقال :وش هالخنبقة الله يجزر عمر الظالم مانيب قايل عمرك .. وبحركة من حركات صكني بالملعقة في خشتي ! واستطرد قائلاً : يالخسيس ياالهيس الأربد والله اني داري ان الدش اللي مركبه انت واخوانك يجيب قنوات فرنسا وتكذبون علي تقولون بس يجيب مباريات ! ..

قلت: يبه الله يجزاك خير والله انك تسمع بفرنسا وش جاب فرنسا وقنواتها والله ان هذا تلفزيون دولتك انا وش دخل أهلي في الموضوع .. قال يا التسذوب أبو متعب لو درى ان التلفزيون فيه هالمراجة ماقعده دقيقه بس أنت تسذوبن أبقع وسمرمدي طالع على خالك محمد


تدخلت كتيبة المشاة اللي هي أميمتي
وقالت وش دخل خاله محمد هااه ؟! خاله محمد عيذه بالله مصلي مسمي مايدوس العيب.. ماجذبه والله الا انت واخوانك ,, الوالد طقته أم الركب وقام يبولع ريقه .. المهم يوم شفتها قبست بين الوالد والوالده وانا اللي أحط رجلي وأطلع غرفتي وأجلس اكتب لكم هالموضوع ..

\
\
\

يا عيال منتداي( زهــران ) .. والله اني مانيب أدّعي الخير أو أقول اني ما أناظر أفلام .. لكن قسم بالله قوية ان تلفزيون المملكة العربية السعودية اللي ينقل الصلوات الخمس والتراويح والقيام يصير فيه هالتطور السخيف !


الله يذكر الفارسي بالخير .. كان رجالن أجودي ومنظبط وماله في هالأمور .. أذكر أنه قد جاب فيلم كنت قد شفته على الفيديو وكان فيلم مليء بالمشاهد الساخنه .. لكن الفارسي أذكر أنه قصقص الفلم وقطع فيه تقطيعن مهوب صاحي وأختصره من ساعه ونصف إلى 23 دقيقه بس ..


صح ان القصة أندمرت والبطلة ماشفناها أبد والمشاهد تخش في بعض وصار الفلم غير مترابط وغير مفهوم لكن يحسب للفارسي انه جاب فلم حلو وجديد ولم يخدش الذوق العام الله يذكرك بالخير ياابو فارسي.

\
\
\

ختاماً ..

آسف للإطالة وأدري أن بعض التقدميين ماراح يجوز لهم رأيي وطرحي فلا أقول لهم سوى : والله هذي الساعه المباركة انت وياه<<<

وكان معكم الناقد الفضائي طررروق وإلى اللقاء مع حكاية نقد جديدة وكشف حساب وزير آخر (( حطوا رجلينكم جاب العيد ))

بس قبل لا أطلع :-

برايفت إلى والدي العزيز

أمووت وأعرف ليش ماطقيتني الا يوم أنتهى المشهد ؟ كان بإمكانك تدبغني في منتصفه أو في بدايته لكن مدري وش سالفتك ..

تحيآتـــي \ طـــويــرق [/align]

[زهوان]

اللخ يجييك على هالغيرة اخوي غعلا اسفاف لابعده
تنقل الصلوات من الحرم وبعده بساعة او اثنتين تبدأ,,,,,,,,,,,,,,,,,,,,,
تدري عاد
انا من يوم غيروا دقة مسابقة رمضان حسيت انهم رايحين فيها
على العموم موضوعك رائع وهادف واياد مدني سينال من الله مايستحق

[ملف ضآيع]

اقتباس: زهوان

مشكور على مرورك الرائع ,, واسعدني تواجدكـ

[ملف ضآيع]

[align=center] --- للـمعلـوميــة فقـــط ---

اياد مدني كان كاتب في صحيفة عكاظ وكتب مقال فيه استهزاء في الدين ويوم سألو بن باز الله يرحمه

قال هذا كافر وعليه ان يستتاب وكرشوه من عكاظ واختفى ولا طلع الا من بعد مامات ابن باز رحمة الله عليه[/align]

[alm7b]

[align=center]V.I.P الله يخلي لك الوالد والوالدة . آمين يارب .
اخوي موضوعك هااادف الى ابعد حد ,,
خلااااص ولت ايام الستر والحشمة ..!!
مع الأنفتاح الأعلامي وضهور قنوات فضائية
جديدة سحبت البساط من تحت تلفزيوننا ..
وصرنا مانشوف تلفزيوننا الا وقت
صلاة الجمعة لأنها منقولة على الهواء مباشرة
.. طيب.. مسكين د/ اياد يبي ينافس القنوات الثانية ويثبت لهم ان تلفزيوننا
لازال بخيرو بصحة وعافية &
ويش تبيه يسوي ؟ قال آكحلها يمكن تحلو عيونها ,,
لكن للأسف جت على عكس ماتمنى الدكتور !!!!
لا هي العين بقيت على ماهي عليه .. ولا سلمت من العمى &&
لكن يبقى تلفزيوننا الحبيب متميزاً في المسلسلات البايخة والأعلانات الرديئة
مشكور تلفزيوننا الغالي .. اقصد V.I.P الغالي [/align]

[ابراهيم الفوزان]

[align=center]تسلم يمينك ياطارق

والله ياخوك ان هذا الاربد هبل بديننا قبل شيوبتنا

من يصدق ان صلاة التراويح العام لم تترجم والسبب ايااااااااااااااااااااااد

من يصدق ان خطبة الحرم اللي كانت تعاد عصر السبت ماتنعاد والسبب اياااااااااد

من يصدق ان افلام سهرة السعودية طازة من هوليويولد والسبب اياااااااااااااااد

من يصدق ان البرامج الدينية اصبحت لاتذكر وماتنشاف والسبب اياااااااااااااااد

اللهم اصلح اياااااااااااد او خذ عمرة

من يصدق ان ابن باز رحمة الله كفرة وحرم علية الوزارة بسبب قضيتة هو وامل عبدالله وما شاف الوزارة الا بعد مامات بن باز[/align]

[الســرف]

الله يصلح الحال ويهدي ضال المسلمين

مشكلتنا أننا نتفاعل مع الإعلام الغربي حين ينتقدنا ويصفنا بالتشدد ونبغى نثبت لهم أننا لسنا متشددين
نعم يجب الاخذ باسباب التقدم والاستفاده من معطيات العصر وحضارته دون المساس بثوابتنا وقيمنا وعاداتنا الإسلاميه
يجب ان تكون لنا خطوط حمراء لايجب تجاوزها رضي من رضي وغضب من غضب


الف شكر
عجبني الموضوع بحواراته الشيّقه واسلوبه السلس الذي يدل على تمكن كاتبه من كتابة الاجمل ونتمنى ان يواصل تسليط الضوء على سلبيات كل وزاره

[جبل منور]

الله يصلح الحال ويهدي ضال المسلمين

...V.I.P ...

... يعطيك العافية ...

... لك أرق التحايا ...

[هـاوي زهـران]

المشكلة تكمن في تقليد الغرب ومحاولة مواكبة عصرهم والاخذ بالسلبيات من الاعلام الغربي
وترك الايجابيات
يعطيك العافية اخوي كيمو على الطرح الهادف

[احمد الدوسي]

نحن دولة اسلامية وتطبق الشريعة وياتي وزير الاعلام ويحارب الشيوخ ويمنع البرامج الدينية بمفردة دون مساعدة

من احد اشك في الموضوع