::: الــشـــايــب و الــوايــــــت :::

[أبــو زيــاد]

السلام عليكم ورحمة الله وبركاته


شايب نوى يشتري له وايت علشان يسقي الحلال , وذالشايب متقاعد

وشاريله غنم

وفوقها خمسين ناقه , فأخذ يجمع له دراهم لين صار عنده حول الخمسة وثمانين ألف ريال

فقام و توكل على الله وعزم يروح يدور له وايت.

صدفه و هو يمشي إلا ذيك الناس مجتمعة في أرض فضاء كبيرة والآَ حولهم وايت واقف.

تعجب خوينا

الشايب نظر هالوايت وهو ماشاء الله يبرق من بعيد ووقفته شي عجيب , قال بس لقيناه خلني اروح

أوصلهم وأشوف كم هو واصل سومه و إذا هم حادينه اشوف كم هو عليه.

وصل عندهم الشايب ووقف يسمعهم يحرجون , وأستانس بالحيل لأنه ماهو غالي.
ولا ذاك الرجال

ماسك الميكروفون ويحرج 50,,52,,55,,ومن قال زود ,

قال الشايب بس شكلهم يحرجون على الوايت ولا هوب بغالي وإن شاء الله يكون من نصيبي.

وخش معهم بالحراج ,,,56,,,ويزودون...ويزود...ويزودون...ويزود.

المهم وصلوه 75,,,قام خربها وقالهم ,,,80

هو قالهم ,,80,,يوم طخوا كلهم و سكتوا..!..وهجدوا..!!..والتفتوا عليه!!!
يناظرونه..و يناظرون بعضهم..يوم تغامزوا ونقزله واحد منهم.. وسحبه على جنب

وقاله شف يا رجال أنت باين عليك أبن حلال وطيب بالحيل , وش رايك لو نعطيك شيك

بمليون ريال ذالحين ,,ذالحزه

بس مانشوف وجهك واقف معنا بالحراج .

انصدم الشايب ..أفتر راسه شوي وقال هااااا..وش السالفة..؟؟؟

مليون ريال ..وليه..؟؟
قال له الرجال (خويهم) بس خذ هالشيك وتوكل على الله والله يستر عليك ولالك بالطبخه.

وش اسمك ؟؟. عطاه أسمه وكتب له الشيك بمليون ريال وصرف الرجال من الحراج وهو مايدري

وش السالفه!!!.

طيب وش العلم علمني ..؟؟

علمه بالعلم. أثر ذا الجماعة يحرجون على المخطط وواقفين بالصدفة جمب الوايت اللي

جايبينه يرشون به الأرض علشان يحرجون.

والحراج من اليوم بــ 56 مليون و 75 مليون..وابو الشباب (الشايب) خش عليهم عرض

ولايدري وش العلم.

وهم بعد أخترشوا شوي يحسبونه هامور وبيلطش عليهم المخطط ..قاموا صرفوه بمليون ريال..

وهو ماصدق. طاير من الفرحه,,مليون,,ويقول بخاطره

عجزت وأنا اجمع خمسة وثمانين ألف ويجيني ذا الرزق من الله

فسبحان الله مقسم الأرزاق على عباده.

الرزق مثل الأجل يتبعك

[جمرة غضى]

سبحان الرزاق العظيم

يرزقكم من حيث لا تعلمون

ان كان القصة حقيقة فهي اغرب من الخيال

سلمت اناملك

[جسد بلا قلب]

تذكرني هالقصة بقصة للشيخ الراجحي أطال الله عمره

مره مسافر من القصيم يم الرياض وشاف جماعة يصلون العصر


ونزل يصلي معهم ..


بعد ماخلص الصلاة طلع الربع شريطية ويتنافسون على المخطط المهم لما شافوا الشيخ يصلي


قالوا خلاص طار المخطط لما انتهى قالوا ياشيخ خذ كذا واترك لنا المخطط ما أدري والله كم لكن بالملايين


المهم ان الشيخ مافي نيته الا الصلاة وسبحان الله خذ كم مليون كذا ..



فسبحان الله الرازق ..

[ريان الفهمي]

الله الرازق