الي عنده بطاقة مستركارد وفيزا ؟؟؟؟؟؟؟؟!!!!!!!!!!

[أبو مراد الزهراني]

الغالبيه متوهق بقروض واقساط وبلاوي ما يعلمها الا الله
وهالاسهم كلت الاخضر واليابس وأما
اليوم بتكلم عن البطاقه اللي تاكل راتبك ومبلغها تافه وقسطها عالي <= وخسيسه بمعنى الكلمة
بطاقه ائتمان أو كريدت كارد او فيزا او ماستر كارد او اميركان اكسبريس .. كللها اسماء لنفس البطاقه

ابغى ابري ذمتي وابين لكل شخص وش هي هالبطاقه اللي يتعامل معاها

اولا : طريقه عمل البطاقه :-

يعطيك البنك بطاقه يكون فيها مبلغ من البنك .. مثلا 10 الف او اكثر ... ويسمح لك تستخدمه براحتك وتشتري فيه
اخر الشهر البنك يرسل لك الفاتوره او الكشف .. فيه كل المبالغ اللي انت استخدمتها.. ويطلب منك تسدد 5% بس!!
طيب وش مستفيد البنك ؟ يسلفك علشان سواد عيوونك ؟؟
لا يقول لك بياخذ عليك فوائد 2 – 2.5 % على المبلغ اللي انت استهلكته
طبعا علشان تكون في الصوره الفوائد ربا صريح !! والكل يعرف حكم آكل الربا

ثانيا :ضرر البطاقه:-

البطاقه ما احد يختلف عن حكمها دينيا !! علشان كذا ببين اضراارها الماديه
انت لما تدفع .2.5% بالشهر .. معناته انك تدفع30% سنويا !!
طبعا بالفوائد المركبه تكون تدفع اكثر لأنهم يسمحون لك تستخدم اللي انت سددته
طيب متى بخلص مسددهم وانتهي ؟؟
الجواب ما راح تخلص.. لأنك تسدد 5% وياخذون منها2.5% فوائد لهم !!
انت تسدد 500وهم ياخذون 250 فوائد لهم !!
وال250 اللي سددتها تستخدمها مره ثانيه
يعني اخر السنه تكون دفعت 3 الاف هديه لهم علشان يسلفونك 10الاف
وتكون ايضا اتخلصت من قسط شهري يشاركك براتبك
طبعا ضربت المثال على مبلغ بسيط 10 الاف ... مع ان فيه بطاقات كثير تتعدى هالمبلغ
على فكره ترا في رسوم ثانيه ما تكلمت عنها اللي هي اذا اتعديت الحد او اذا ما سددت شهر او اذا سحبت منها كاش

ثالثا : انت متوهق بالبطاقه الحين.. كيف تتخلص منها :-

اول خطوه تجيب مقص !! وتقطع البطاقه!!لأنك كذا تكون وقفت الاستهلاك
ثانيا تجمع كل الكاش اللي حولك وتضغط على نفسك هذا الشهر ولو تقدر اتسلف من اقاربك وسدد اكبر مبلغ تقدر عليه
هذا تصرف تسويه هالاسبوع .. قبل تنزل عليك فوائد
يعني لو عليها
10 الاف وقدرت تجمع 5 او 6الاف ... راح تكون قدرت تتخلص من جزء كبير من المشكله
واول ما ينزل راتبك الشهر اللي بعده .. تحاول تدفع كل اللي ما تحتاجه ضرووري فيها ...
ولو قدرت تسدد كل المبلغ الباقي يكون بركه ..او تسدد 2500 هالشهر ...
وتكمل 2500 مع الفوائد الشهر اللي بعده
التزم بالخطه وتكون تخلصت منها في 3 شهور !!
وبكذا تكون تخلصت من البطاقه نهائي
طيب لو بطاقتك عليها 20 او 30 الف ؟؟ ولا تقدر تدفعها كللها ؟
الحل انك تاخذ قرض عادي من البنك مدته سنتين بس ..ولو عندك قرض من اول حاول تجدده وتسدد البطاقه
مع اني ما انصح بتجديد القروض .. بس البطاقه ضررها اكبر بكثيييير
على فكره
القرض على سنتين فوائده 4% سنويا تقريبا مقارنه بالبطاقه اللي تاخذ 30% سنوي
وطبعا اذا خلصت البطاقه روح البنك والغيها وخذ ورقه مخالصه

وبكذا تكون ريحت بالك ووفرت فلوسك ..ال3 الاف اللي تدفعها فوائد روح مشي بها عيالك ..
وديهم للطايف خللهم ياكلون برشومي ويرجعون
ولا اشتري فيها شي لنفسك .. اتدلع ب3 الاف سنوي
اشتر هديه لأم العيال

رابعا : البطاقه ما استغني عنها.. تفك لي زنقات اخر الشهر :-

طيب يالغالي .. انت لما تخلص البطاقه وترتب امورك .. حط لك 5 الاف في حساب منفصل
سميه "توهيقه اخر الشهر”
واذا مررررره انزنقت اخر الشهر لو اسحب منه شوي ..واذا نزل الراتب علطول روح سدده كأنه بطاقه ورجعه 5الاف
او سدد 5% منه عالاقل
طبعا الاقساط بتكون اقل لأنك اذا سددت 5%راح تحسب لك كللها دفعه ما راح ياخذوا منها 2.5%

ختاما: اذ انت تحتاج البطاقه للسفر او للشراء من الانترنت :-

طلع لك بطاقه فيزا وخلي حدها مثلا 3الاف
واذا بغيت تسافر سدد فيها قبل السفر المبلغ اللي تبي تصرفه
وروح هناك واستخدم على كيفك
وكل هذا بدووون فوائد ولا هلله
ولو استخدمت شي من فلوسهم سددها اول ما تصدر الفاتوره او الكشف.. ولا ياخذون عليك فوائد ولا هلله !!

في الختام
ارجوا منكم صادق الدعاء
واتمنى منكم التفكير بالموضوع بمنتهى الجديه
وجزاكم الله خير الجزاء ووفقكم أخواني بمنتدى زهران الكرام وعلى الحب والخير نلتقي دوماً ..

أخوكم / أبو مراد العُمري

[جمرة غضى]

ولله الحمد لا أملك هذا النوع من البطاقات ولا أهلي كمان

بصراحة ضررها أكبر من نفعها وإن كان الشخص يتوهم نفعها

فهي مثل السم في العسل

بورك فيك أخي أبو مراد وسلمت أناملك على التنبيه

[أبو مراد الزهراني]

اقتباس: المشاركة الأصلية كتبت بواسطة جمرة غضى      ولله الحمد لا أملك هذا النوع من البطاقات ولا أهلي كمان بصراحة ضررها أكبر من نفعها وإن كان الشخص يتوهم نفعها فهي مثل السم في العسل بورك فيك أخي أبو مراد وسلمت أناملك على التنبيه

شكراً لمرورك الكريم على موضوعي أختي جمرة غضى ..

[ســيــــف العـــــرب]

الله يوفقك لكل خير : أبا مراد

على حرصك على تحذير إخونك وأخوتك من هذا البلاء

الذي لا يعلم مدى خطورته إلا من أُبتلي به

أسأل الله أن يجنبنا جميعاً الربا بجميع أنواعه

ويهدي المتعاملين به والمروجين له تحت شعاراتهم البرّاقة

أكرر شكري لك أخي الفاضل

[الزهراني حسام]

فعلا والله انها دمار عطونياها البنك الاهلي فيها 17 الف واستخدمت المبلغ كامل دفعه وحدده
ثلاث مرات وسددتها كاش دفعه وحده وألغيتها قاموا اتصلوا علي من البنك قالوا نعطيك لحد 30 الف ورفضت .

يعطيك الف عافيه ابومراد

[Amazing]

السلام عليكم

اخي ابو مراد بطاقة التمويل البنكي هي بصراحه بطاقه مهمه جدا وخاصه للذين يستخدمونها عن طريق النت يعني انا استخدمها للشراء من النت وايضا حجوزات الطيران ولكن بالنسبه لموضوع انها ربا وتخسرك فوائد فيوجد نظام مسبق الدفع يعني المبلغ الي تحطه تستخدمه اذا ما الفائده ؟ الفائده مثل ماذكرت للنت يعني لا ربا و ديون واقساط المبلغ الي تحطه بتستخدمه

فانا استخدم مسبقة الدفع وهي مفيده جدا جدا

شكرا لتوضيحك

[ابن مخزوم]

لحظه من فضلكم أنا أخذت فيزا من الراجحي , فهل هذه البطاقه من الراجحي نوع من انواع الربا خصوصا أنني سالتهم فقالوا لي أن هذه البطاقه ليس عليها فوائد , بس فقط تدفع مبلغ الخدمه في البدايه و هو 250 ريال ثم بعدها على قدر ما تقترض يعطونك ويأخذون منك نفس المبلغ فيما بعد ؟؟؟

هذا الذي فهمته منهم , فهل في الأمر من شيء من الحرام ,,, ارجوا الإجابه ....؟؟؟؟

[شمسuae]

اول خطوه تجيب مقص !! وتقطع البطاقه!!لأنك كذا تكون وقفت الاستهلاك

هههههههههههههههههههههه <<بتقطعها ثاني يوم بتطلع غيرها

صارت ضروره بالفعل بس فيه كارد ما اعتقد فيها ربا لانها من بنك اسلامي ومثل ما قال اخوي قبلي المدفوعه مقدما احسن حل


والله يبعدنا عن الربا

تسلم على الموضوع اخوي

[أبو مراد الزهراني]

لي عوده إن شاء الله لحل هذه النقاط التي ذكرتموها وسيكون نقاش إن شاء الله هادف يخدمنا جميعاً واعذروني الآن ولكن في الليل إن شاء الله وتحديداً بعد العشاء نضع النقاط على الحروف ونخرج بفائده إن شاء الله .. أشكر كل من شارك وأبدى رأي دمتم بخير وعافية إن شاء الله ..

[Z@HR@N]

كلام سليم
الاخوان اللي يستخدمون البطاقات في الشراء من النت
يوجد بطاقات مسبقة الدفع اللي اعرفه البنك الاهلي يقدمها