قصيدة سليم الشمري و ردي عليها

[الشغموم]

ارسل لي سليم الشمري قصيدة مشاكاة ورديت عليها اتمنى ان يحوز ردي وقصيدة سليم على رضاكم

قصيدة سليم الشمري
البارحة يوم المخاليق نعاس
كدّر على القلب الشقيه هواجيس
قمت ادرج الافكار والفكر منحاس
وثارت براكين الضماير مقابيس
سهرت ليلي بين وقفة ومجلاس
وونات صدري في ضلوعي محابيس
هموم فكري شبّت الشيب بالراس
قامت تداحم كنها هايم العيس
من زود همي ضاق صدري بالانفاس
و كنه يحمي القلب فوق المحاميس
يا ناس كفو اللوم تكفون يا ناس
ماحد سمع قصة عنتر وقيس
وش حيلة اللي ذاق مرين في كاس
من قشر حظه والليال المتاعيس
يا ناس خلو تايه الفكر محتاس
وخلوه يكتب ونته بالقراطيس
بسوق الذهب يشتال الاغراض باكياس
واتبعتها فاقد جميع الاحاسيس
مزيونة في لبسها عقد الالماس
و يا زينها لو خلت العقد بالكيس
يا رموشها اللي كنها رمح جساس
من ناظرتي بالعيون النواعيس
الله وهبها الزين من دون مقياس
ما قلدت بالزين نجوى وكاريس
الليا اقبلت من شافها قال عساس
واليا ادبرت في دربها كالجواسيس
هذا السبب في الهم والناس نعاس
والله يعين اللي بقلبه هواجيس،،


وهذا ردي على القصيدة

في المبتدى سميت به خالق الناس
واهلا بقاف زان بيض القراطيس
لولاه شفت الليل في ضوح قرطاس
مازون هيض بي جميع الهواجيس
من صاحب ن يشكي عنا ريم الاطعاس
اليا سرح بالزاهيات الملابيس
مفنود عن الاريام بالماس والباس
ما كنه الا بسمة ن للمتاعيس
لاقبل تفز حذاه واتدق الاجراس
وان سار عنك تقول للعافية ليس
غارت عليك من المناعيس الافراس
واتحوم بارضك ظايلات الكراديس
الحظ قفا عنك وابليت بانحاس
من شفت عود البان بالناسم يميس
افديك دام اني على الطلع قرناس
وامنعك حيث اني سعوط الملاحيس
دام السما للطير والناس للناس
ابكسب بدنياي مدح السناعيس
يا راشف الحرفين مع ماية الكاس
سايرت بن لعبون وامحيسن وقيس
بلواي من بلواك وسواس خناس
اما توسوس او ترد الوساويس
عاينت في قلوب العشاشيق الامواس
والخود عاثت في قلوب الغطاريس
والشوق ما يرحم قلع ثابت الساس
والساس لو يبقى بقى ساس بلقيس
والقلب ما ينسى غرامه والاحساس
القلب ثابت بين عوج مقاويس
والله لو ناديت والليل خرماس
ما لد صوبك بالنظر حادي العيس
لا باس يا ولد الشغاميم لا باس
اتهوش باكر هايفات المغاريس
في الحب لو قاسيت لا تقطع الياس
لو شاح جيبك واتضح منك تفليس
لابد ما ترتاح باظلال وابكاس
وتقول بالهجران وامكابده بيس
اختم وصلى الله على خير الاجناس
عد الصبا واعداد دلج المعانيس،،،

[فهد سعود الزهراني]

صح لسانك ولسان الشمري

مجاراة جميلة منك بلاشك ومليئة بالمصطلحات البدوية التي قد لا تكون مفهومة للكثير مننا

[الشغموم]

اقتباس: المشاركة الأصلية كتبت بواسطة فهد سعود الزهراني      صح لسانك ولسان الشمري مجاراة جميلة منك بلاشك ومليئة بالمصطلحات البدوية التي قد لا تكون مفهومة للكثير مننا

صح ابدنك اخوي تسلم كلك ذوق ويعطيك العافية،،،

[احمد صعمود]

بدع ورد ولا احلى تستحقون الاشاده

صح لسانك ولسان سليم الشمري

بالفعل امتعتونا وثقفتونا يعطيكم العافيه

تقديري

[سيف الجفا]

صح لسانك واعتلى شانك

مجاراة جميلة
والله يعطيك العافية

[الشغموم]

احمد صعمود تسلم وكلك ذوق صح ابدنك والله يعافيك اسعدني مرورك اخوي

سيف الجفا صح ابدنك وكلك ذوق الله يعافيك اخوي

شكرا،،،

[اللباة]

لافظ فوك يابن زهران

كفيت ووفيت

والساس لو يبقى بقى ساس بلقيس

بيت رائع

[الشغموم]

اقتباس: المشاركة الأصلية كتبت بواسطة اللباة      لافظ فوك يابن زهران كفيت ووفيت والساس لو يبقى بقى ساس بلقيس بيت رائع

تسلمين اختي اللباة ويعطيك العافية

اسعدني مرورك ،،،

[عيوني لك]

امتاع في البدع وابداع في الرد
استمتعت كثيرا بهذا التميز شكرا لك

[السلطانة]

اللهم صلـ وسلم على نبينا محمد....

إبداع في البدع والرد>>> لاهنتوا على هالتميز
اما توسوس او ترد الوساويس>>> صح لسانكـ أخوي
واصلـ تألقكـ وبالتوفيق....