ملحمة الحب

[فلاح بن منشار]

السلام عليكم
مع اعتذاري لقلة المشاركه
لقلووبكم
[poem=font="Simplified Arabic,6,#000000,bold,normal" bkcolor="" bkimage="" border="none,4,#400000" type=2 line=0 align=center use=ex num="0,#400000"]
شجاني صوت خلي يوم ناجاني من الوجدان=وعزالنوم من عقب الفراق وشلت موالي
على وقع الجروح اللايعات وحرقة الاحزان=يحنّ القاف من رجع الصدى والشوق مرسالي
ونام الناس وانا والنجوم الساريه سهران =اناظر صورتك يامن غرامك مشغلن بالي
تحريتك على برج الثرياء وانتخى الميزان=ومن بعده سهيل وصار عند القوس تجوالي
اناجي نجمة الفجر اتحرى صبحك النشوان=واشوفك بالحشى ساكن وقدرك فوقها عالي
تكدر خاطري من غيبتك وانهلت القيفان=وضاقت بي الوسيعه في بعادك بين الاسمالي
يسافر بي الخيال ويعتريني صوبكم تحنان=ويمضي الليل متباطي وكنه كف مغتالي
سيوف البعد والحيره ونار الغيره والهجران=وصوت الروح مبحوح الحروف وبرقه اوما لي
سكبت الدمع فاض الصدع سال الرجع بالبران=سقى ناوان والصمان وارض عمان همالي
يمر الوقت وانا منتظر شوفك على نيران=من اللهفه سيوف الصبر مسلولات طوالي
افكر فيك وانسى كل شي حتى ثرى الاوطان=واشوفك وحدك بدنياي والباقين عذالي
رسومك طيبك افكارك كلامك بسمتك سلوان=يغارن العذارى من جمال الروح يامالي
عيونك والوجن واثمك وخشمك ترجح الميزان=وشعرك والجبين وخدك الباهي دوى حالي
جمالك فوق وصفي والرضى ياقايد الغزلان=سلم لي ياعسل منطوقك الصافي بالارسالي
الا منك حكيت يصير بين الخافقين آمان=من البحه لضى والهمس لاهل الشعر جوزالي
يسيل الشوق من بين الثنايا كنه الوديان = ومن نبع النوى يسري حنينك بين الاوصالي
دلالك ثورتك نبرة حروفك طرفك النعسان=شموخك والتواضع والصراحه جعل تحيى لي
سلامك عشق وايمانك ووناتك رضى الزعلان=وشوقك واصطبارك وانتظارك حيل قتالي
عشقتك يوم شفتك ماتماديتك على النكران=رضيتك ماسليتك عشت ياكيفي وفنجالي
لطبعك مال قلبي وارتوى بك جوفي الضميان=وهام الفكر بك من عقب ماهو قبلكم سالي
عسى كل العذارى فدوتن لك ياغصين البان=وعسى قلبن بحبك مبتلي يفداك يالغالي
انا لولا غرامك ياحبيبي ماسكبت اشجان=ولا حسيت بالحرف المتيم وان تهيا لي
عرفتك طيف هز الكيف مثل السيف والنيشان=شربتك راح طيبه فاح ماينزاح مدهالي
عشقتك عشق روح وزهر دوح وسرت لك عميان=تربع حبك العذري بروحي اول وتالي
هوى صادق نوى عاشق بحورن مالها شطئان=ومرفاها المشاعر والجوى تيار متوالي
تبادلني الشعوروتصطلي مثلي ورى البيبان=هجرنا كل شي لاجل الغرام وصار منوالي
ركبنا مركب العشاق وقت اشراق دون رهان=هوى نسناس حاكى فاس كنه ماس صومالي
سجى طيره على وقت الدجى سج الحشى سجان=وانا سجيت بالمسحوب يوم الطير سجا لي
تساقينا الهوى في كاس خمري كله اطمئنان=وعلينا ضما مادري عما من غيه اغمالي
وسار المركب الجبار فوق ابحار بالميزان=تحدى كل موجه والعواصف تحته اهمالي
من الياقوت والجوهر ومجدافه من الصوان=وتاجه من زمرد والذهب والفين مرشالي
جنوده نار وعيونه شرار وهامته محجان = وقاعه من جحيم الغيره تشوي كل جفالي
شربنا وارتوينا واعتلينا هامة الميدان = عرفنا كل شي من حولنا صادق ومحتالي
انا ماكنت داري قبل حبك عن جوى الحرمان =ولاكنت احسب ان العشق جمره بالحشى صالي
جواني صدرك الملهوف وادمى خافقي العطشان=وصاح الجرح فيني كنه البارق وسلالي
بغيت اشكي جروحي بين ربعي وانهي الكتمان=وخفت ان العواذل يشعلون النار وفتالي
على قلبي ترفق ياحبيبي يوم هو لك لان = ترى ماحل بك ياقلب مضنونك بنا حالي
اذا نار الجوى يكوي خفوقك جمرها الوهجان=فانا في حرها مسهود كني جوف مرجالي
تمزق خافقي كنه شظايا ثورة البركان = وجز الروح شوقي لك وغنى الليل غربالي
كواني جرحك الدامي وجرحي من هواك الوان=شكيت ولك شكيت وكل قلبن شايل احمالي
عشقتك عشق مابه شق ماذاقه ولا عشقان=طربتك ناي في مسراي رايح جاي صوالي
شربتك ماي ذقتك شاي غصن البان والرمان=لمستك ضي تحت الفي طرفك فيه سبالي
ملكت الروح والاحساس والخفاق بك ولهان=افكر فيك طول الوقت وانسى كل الازوالي
انا لك ياحبيبي وانت لي مابيننا سلوان=هوى روحين سامي ماتهزه كل الاحوالي
حبيبي تشتكي يابعْد عمري دوكني حيران=من الجرح انبرى قلبي ولا حققت الآمالي
انا يتعبني الي يتعبك واحس بك فرحان = ومايجري لقلبك ياحبيبي العمر يجرى لي
تألف بين روحينا كسى وجه الوجود ابوان=وصرت الوجهه الي يمها مقفاي واقبالي
رسمنا درب لاهل الحب منه البحتري غيران=وعنتر غار ياليلى وقيسك صب جوالي
تحدينا القصص في حبنا بالحضر والبدوان=وسطرنا الغرام ازهار كل اكليل منهالي
يفوح الطيب من سيره تحدت فكرة العربان=لها كل القلوب العاشقه شدن وترحالي
من اعماق الشعور انسامها مصيونة الجدران=وطاريها مثل لاشك تزهى منه الامثالي
سقى روض الغرام النبع وانبت عشبه الريان=وبالوان الورود الساحره زان التعلالي
انا يكفيني احساسك وحبك عن جميع انسان=ومادامك تبادلني الشعور فكل شي بالي
اذا وصف العذارى بالغصون الوارفه والزان=فغصنك خيزران ولمستك صفصاف نيبالي
اشمك عود جاوي يبري العله من الوجلان=واشوفك مثل زهر الزنبق المتخفي الشالي
يغارن الزهور اليا تفتح ينعك الخجلان=ومن ذوقك يغارن البنات بكل الاجيالي
ايا عذب اللمى يافاتني من صوتك الرنان=تراقص كل شي حولي وغنى الورق منزالي
لهمساتك سرى في خافقي تيارك الفنان=وسوى لحن صوفي والصدى بالروح خيّالي
اذا مازار طيفك ضامري ساقه على الشريان=ولامنه وصل عند الأذين اجتاز الاقفالي
يعدي للبطين وينتقل للروح كنه جان = يصحيني من النوم ويذكرني بترحالي
اناظر كل ماحولي واشوفك للهوى عنوان=وتضوي صورتك في كل حاجه مثل سلسالي
يجود الوقت في وصلك وتقفل بعدك الركبان=ويظلم كل مابالكون لاقفيت بفلالي
معك يحلى الهوى ياروح مامسنه الابدان=ولا به غوّل يثري ساحة العشاق والرالي
نضيف الثوب ماشابه من اهل المخطيات ارزان=تسامى عالدنايا صانه المولى من القالي
تعاهدنا على صون الهوى رغما عن الشيطان=وصنت العهد وانا صنت حبك رغم الاهوالي
ركبنا في سفينة حبنا واحنا لها الربان = وقدناها على الموج العتيّ وصانها الوالي
تقل لي يافديت الصوت ياقلبو وبعض احيان=تقل روحي تحبك يابعد عمي معا خالي
وانا اقول اعشقك ياعود كادي طوّقه ريحان=وياريح الخزامى في صحارى نجد وانفالي
تساقينا الهوى من نبعه الصافي بلا حسبان=وغرد حولنا طير الحمام الزاجل ارتالي
شربنا مارتوينا والعطش بارواحنا بردان = وخاب الحاسدين الي تردو بين الاوحالي
تبارك حبنا رغم الاعادي واستوى البنيان=وخلف السور ضاع اهل الخديعه بين الانكالي
بنينا قصر عالي للمشاهد ثابت الاركان = على صدر الحقيقه نورنا ساطع ومختالي
سلم لي قلبك وروحك فدى لك قلبي الغرقان=وتفديك النفوس الي بها غول وتمنذالي
عسى عين الحسد تعمى وراعي الحقد بالحقران=وعسى من لامني في حب روحك بالتجلجالي
اعرْفك ياحبيبي مثل ماعرف ان ذاك فلان=عديل الروح مابك شك رغم اهل التشنكالي
يضيع اهل العقول العارفه من نورك المزدان=ويخضع لك ملوك الارض لو شافوك بالحالي
لقيتك بعد ماضيعت من عمري كثير ازمان=لقيتك منيتي شفتك وحبيتك وبك فالي
عطيتك مهجتي من غير منه والمدى برهان=وصرنا لون زاهي مختلف عن كل الاشكالي
سقينا حبنا بالود واروت قاعه الامزان = ومن دمع المآقي وادي الاشواق سيالي
انا ادري بالذي يطري على بالك وبك شفقان=وتجرحني جروحك ياحبيب العمر بجمالي
تبيني مثل مانا ابيك لاكاسب ولا خسران =تعادل بالغرام وصبر يعجز كل كيالي
تسامينا عن الهفوات كنا بالهوى فرسان = ندير المعركه بين القلوب بفن واجلالي
بنبضك تنبض عروقي ويسري نبضها طربان=يغني للهوى لحن الغرام الخالد الدالي
اعيشك حلم لم الشمل صافي النهل ميل اردان=اذوقك طعم ماهو زعم متسربل بسربالي
سقاني كاس حبك عين لبك بالهوى مليان =وانا بالحب كأسي رائشٍ لعراه سيالي
طربنا وانسكبنا حرف راقي قافيه وامتان=شربنا مارتوينا من حلاوة عشق عسالي
كتبت الحرف لاجل الترف عقب الصرف له عرفان=سبكت القاف للوصاف صل الحرف صلصالي
سريت الليل فوق الخيل تحت السيل للصيوان=وذقت الويل بين الجيل من هيفا وبسكالي
ركبت الصعب شفت الرعب طب القلب بالطوفان=وضاع الحزم بين العزم كن الرزم زلزالي
نسيت الناس والجلاس كن الراس به طيران=ينادي كل شادي من عنادي رتم جندالي
سنى برق ورعود الحب داخل قلبي الغرقان=تهد جبال من زلزال عشق يهز الابطالي
توحد بالمشاعر والنوى قاهر وله ديوان=وتحته عرش بلقيس المزان بجوهر ايطالي
تضائل تاج قيصر واحتجب كسرى في الخليان=وضاع الروس واليابان تحت التاج خنذالي
الا ياجوهره ياعقد لؤلؤ لامسه مرجان =الا ياخط كوفي صاغ لوحة فن سريالي
مجمل مكتمل كل الجمل مثل العسل تبيان=من الثغر المطرز بالكرز حول الخرزكالي
محجل بالخجل فرخ الحجل حالي الوجل هيجان=توهج وابتهج والغنج نغمة عود دوكالي
تهامى وارتمى واجوى وغنى والتوى ليّان=وناجى والتجى واروى وحاكى غصن ميالي
ثملنا من كؤوس العشق واحتارت بنا البلدان=وغنى للهوى زرياب معه الفين طبالي
كتبت الحب لمسة صب نغمه من صدى كروان=لاغلى ترف صغت القاف فيه سفود واغلالي
صدى هاجوس من راسي رسمته للهوى زهران=يشوق اهل النفوس العاشقه قافه وموالي[/poem]

[محمد الخضر]

ماشاء الله تبارك الله ,,

اعوذ بالله من العين والحسد عليك,,

ماشاء الله تبارك الله ,,

اخي فلاح ,,,,

ننااااااادررر انت ناااااادرررر

فلاااح شاااامخ والله العظيم شاااامخ ,,

كل بيت يجذبني اليه , من اروع ما قرأت

شااااااااااااااااااااااااااااااااااااااااااااااااا ااااااااااااااامخ انا اشهد انك شااامخ , , ,

ماشاء الله تبارك الله

سجلني احد المعجبين وبقووة بك وبنادراتك ,,

,,,,,,,,,,,,,,,,,,,

[صالح بن فارس]

الله الله يابو محمد

استااااااااااااذ وربي

مو غريبه عليك هالابداع يابو محمد والله يحفظك ويرعاك

تقل لي يافديت الصوت ياقلبـو وبعـض احيـان
تقل روحي تحبـك يابعـد عمـي معـا خالـي
وانا اقول اعشقك ياعود كـادي طوّقـه ريحـان
وياريح الخزامى فـي صحـارى نجـد وانفالـي


يا لبى قلب قلبو يا شيخ

صح لسانك

ولا هنت

؛؛؛؛

[نايف العمر]

جنوده نار وعيونـه شـرار وهامتـه محجـان
وقاعه من جحيم الغيـره تشـوي كـل جفالـي


البيت هذا ذكرني بقصيده للشاعر محمد بن ثامره رحمة الله عليه



الموسيقى عاليه جدا في هذا النص ،، والاحساس ايضا ً



فلاح انت رائع ،، صح لسانك حتى الرضى

[خالد القرشي]

الله عليك يا ذيب ... شاعر من ظهر شاعر كبير ولا تحتاج شهادة من أحد ... سلمت يا فلاح بن منشار وصح لسانك

مـــــــــــــــــــــــــا شـــــــــــــاء الله تبارك الرحمن

[الريــــم اللعـــوب]

حجز ... ولي عوده تليق...

[آل صرار السعدي]

يسيل الشوق من بيـن الثنايـا كنـه الوديـان
ومن نبع النوى يسري حنينك بيـن الاوصالـي



لطبعك مال قلبي وارتوى بك جوفـي الضميـان
وهام الفكر بك من عقـب ماهـو قبلكـم سالـي




سقينـا حبنـا بالـود واروت قاعـه الامــزان
ومـن دمـع المآقـي وادي الاشـواق سيالـي




كتبت الحرف لاجل الترف عقب الصرف له عرفان
سبكت القاف للوصاف صل الحـرف صلصالـي




كتبت الحب لمسة صب نغمه من صدى كـروان
لاغلى ترف صغت القاف فيـه سفـود واغلالـي


ابن منشار


هذه معلقة هذا العصر

يعجز الوصف والتعبير


فالك البيرق


تقبل اجمل وارق تحيه