[خبر] احذرووو نصب وتحايل موظفي كارفور ..!!

[زهراني من الرياض]

السلام عليكم ورحمة الله ...

كارفور مشهور ان عليه اطلق تخفضيات عشان كذا الناس تجيه ..

لكن في المقابل عليه اكبر نصابين وحراميه ..

<<< كفايه انهم يبيعون لحوم فاسده .. بصراحه سمعته راحت وطي ..

انا صار لي موقفين من ذا الكارفور ..

امس رحت بشتري لاب توب وابي مواصفات عاديه لانه حق جامعه ومحاضرات .. ويجيك الموظف ويقول لي:

الاب توبات هاذي ضمانها سنه وسرعتها بطيئه << وكلامه صح من ناحيه السرعه .

قال لي انه في تخفيض على واحد سرعته زينه وضمانه 3 سنوات .. <<<وحطو عشر خطوط على ضمان 3 سنوات

وقلت بتوكل على الله وباخذه خصوصا ان مواصفاته حلوه وما عليه .. ويوم ادفع واجي استلم الجهاز واقرا الورقه القى مكتوب انه سنه وحده بس ...!!!

ناديت الموظف الاجنبي اللي نصب علي وعطيناه كم تهزيء وخوفناه بالقضاء والشرطه ..ألخ << يمديني .. خخخ

والجهاز رجعته واخذت فلوسي ... هذا غير اني لقيت واحد سعودي يتهاوش معهم .. توه شاري الجهاز بقراطيسه وخرب بعد اسبوع .!

[زهراني من الرياض]

والموقف هذا ذكرني انه صارت لي عمليه احتيال قبل كذا .. يوم شريت كاميرا قبل كذا وبمواصفات معينه مررره حلوه شفتها في العرض ..

توكلت على الله وخذيت الكاميرا .. وطلعت بمواصفات متواضعه اقل من اللي شفتها في العرض ..وانا من العجله نسيت اشوف رقم الموديل << على نياتي واثق بامانه الموظف .. وللاسف ما يمديني ارجعها لاني كنت بسافر ..

طبعا انا ما رح احلل ولا اسامح الموظف هذا حسبي الله عليه الله لا يسامحه ..

وقررت اني ما اروح الا جرير ولا اكسترا ولا الكترو ولا وحده من ذا المحلات الصاحيه ..

[زهراني من الرياض]

لاحظو انه المواقف هاذي ما تصير الا مع موظفين اجاااااانب ... <<< وماركه معينه بعد ..

اذكر مره رحت هايبر بنده عند موظفين سعوديين عشان اشتري جهاز ..

والله يا عليهم امانه .. صحيح اني طفشت وانا انتظرهم يجيبون الجهاز .. لكن على الاقل الواحد يحس ان الدنيا فيها خير..

لانهم كم مره يجيبون جهاز ويدققون في مواصفات اللي في العرض والموديل ويطلع مو نفسه ..

انا طفشت وقلت لهم اني بطلع ... ويوم جيت ماشاء الله عليهم ما يجتاج الواحد يدقق من بعدهم .. نفس الموديل والمواصفات اللي في العرض ...

الله يكثر من امثال ذا الموظفين : السعودييييييين ..

[طوق الياسمين]

اقتباس: المشاركة الأصلية كتبت بواسطة زهراني من الرياض      وقررت اني ما اروح الا جرير ولا اكسترا ولا الكترو ولا وحده من ذا المحلات الصاحيه ..

كلهم نصابين يازهراني والله يشهد علي في الكلام اللي باكتبه هنا :
جرير ماذكر شريت من عندهم اجهزة ماكنت اشتري الا لوحات الرسم والفرش ايام الدراسة وافضل واجود الماركات عندهم في هذا المجال لكن ماقدر امدحهم ولا اظلمهم من ناحية الاجهزة ، ولا حتى الكترو ماعرف عنهم
لكن اكسترا لي معهم موقف وأنا مسؤولة عن كلامي .. انا اتعامل مع فرعين الفرع اللي بغرناطة مول ممتازين جداً وثقة ومتدربين وفاهمين كل شي .. لكن الفرع اللي عند إيكيا عندهم هندي مسؤول كبير في صيانة الاجهزة وبيعها (اجهزة اللاب توب) احذر الجميع من التعامل معه واللي يجازف ويتعامل معه ماحيحصل اللي ينصفه
وديت له جهازي لان فيه مشكلة ماعرف هي من البطارية والا من الشاحن قام دخلّ جهازي عنده في غرفة خلف الحاجز وصحت فيه وقلت له تقدر تختبر البطارية والشاحن هنا قدام عيني .. أول ماشفت الحركة ذي عرفت أنه ناوي يبدل قطع الغيار فيه لان اصلا تحت كل كاونتر كيبل مايحتاج يدخل الجهاز لغرفة الصيانة
مو بس كذا قال بطاريتك خربانة جا عليها موية وكمان شاحنك خربان .. قلت ياسلام وكم الجديدة قال البطارية 400 ريال والشاحن 250 ريال ، شريت البطارية وتركت الشاحن ويوم وصلت البيت الا والبطارية ماتقول ولا كلمة مع انها كانت تشتغل في المحل اشحن والا اخلي طافي جهازي وارجع له قلت خذ بطاريتك وهات فلوسي ، وبعد الملعنة والانتظار وكل موظف يرمي بلاه عالثاني استرديت فلوسي بالقوة لأنه كان رافض رفض تام إني استرجع فلوسي
المصيبة أنه يقول احنا نوصل للبيوت قطع الغيار (أول مره اعرف ان محل اكسترا يوصل للبيوت) خخخ قال الشاحن اللي عندي تبع توشيبا يمشي مع جهازك بس انصحك تنتظرين يومين وتوصلنا كمية من شواحن ديل ومايحتاج تجين هنا اوصله لك اذا حبيتي .. انا عرفت ان الهندي يبغى يفبركها على راسي بيشتريه من حراج الكمبيوترات بالعليا ماهوب اصلي من ابو 70 ريال ويوصله للبيت ويقول هذا ابو 250 اصلي لعنة الله عالنصابين
قلت له لا توصل ولا شي وانا مانيب بنت ابوي أن عاد جيت لفرعكم ذا وبلغت عليه المسؤول هناك عن سالفة التوصيل عشان ثاني مره يعرف ينصب عالناس!

اقتباس: المشاركة الأصلية كتبت بواسطة زهراني من الرياض      اذكر مره رحت هايبر بنده عند موظفين سعوديين عشان اشتري جهاز .. والله يا عليهم امانه .. صحيح اني طفشت وانا انتظرهم يجيبون الجهاز .. لكن على الاقل الواحد يحس ان الدنيا فيها خير

بنده مره حاسبت بـ 670 ريال تقريباً وطول الطريق وانا افكر بالمبلغ ماهو خاش مزاجي واول ماوصلت البيت فتحت الفاتورة باستعيد مشترواتي والاقي ابو الشباب اللي محاسب لي حاط لي 4 درزن مناديل كلينكس وانا ماشريت وصينية تيفال وانا ماشريت ومطهر ارضيات ومدري وش بعد .. اشياء ماشريتها وارجع لهم ثاني يوم قال المسؤول هناك انتي الغلطانه المفروض تراجعين فاتورتك دامك شاكه قبل تطلعين من عندنا !
طبعا رحت ادور ابو خشه "السعودي" اللي نصب علي وحط الدراهم في جيبه ولا حصلته اما ان هذاك الوقت ماهوب وقت دوامه أو انه انهى عقده معهم على حظي .. جلست اسبوع والـ 200 ماغصتني في بطني اتقبل القبلة وادعي عليه عسى ربي لا يوفقه .



البلد صار فيها نصب عيني عينك اذا الواحد مايفتح عيونه ويقرأ بنفسه الاسعار والضمان والجوده ويراجع الفواتير قسماً بالله أنهم يغشونه ومايخافون الله ولا عندهم لا ذمة ولا ضمير سواء كان البائع سعودي أو اجنبي .


مشكور اخوي زهراني على موضوعك وعذراً على الإطالة .. كان لازم اقول تجربتي أنا بعد
تحياتي

[سعد الحبيطه]

عدم وعي المواطن خلى الكل يستغله المفروض كل شخص يسال عن أي شي يود شرائه هنا في عمنا الشيخ قوقل وياخذ فكرة كامله ويتجة لسوق فقط لرؤية


موضوع رائع

ودمتم بوود

[زهراني من الرياض]

مشكورين على مروركم وحياكم الله ..

اخت طوق ...

تراني المح فوق لتوظيف السعوديين ... << يبغى يظمن لخشته الوظيفة .. خخخ

يمكن مو كلهم الاغلبيه عندهم ضمير او يمكن خايفين على الوظيفه

فتلاقيهم توووب في التعامل ..

وكلامك في الصميم وذكرتيني بمقوله الوالد: السعودي ما في من يحميه ..

[زهراني من الرياض]

اخ سعد ..

كلامك صحيح ..

لكن الواحد لمايشوف الاجهزه على الطبيعه بينسى كل اللي في باله

او لما يكون الجهاز اللي حاطه في باله مو موجود يضطر يدور البديل ..

السالفه يمكن مو سالفه وعي .. نص الشعب اذا مو كلهم يفهم في الاجهزه ..

لكن السالفه لما يربكك الموظف ويلف ويدور وما يعطيك نفس الموجود في العرض.. << والمشكله وراك سفر ما يمديك ترجعه ..

قهرررر للحين وانا متحسسسسسف ..

[أبو مراد الزهراني]

والله يا زهراني كار فور الله يبارك لهم فيه فيه نصابين غيره كثير ..
رحت لهيبر بنده وأنا متأكد إن المقاضي الي شريتها ما تتجاوز 800 ريال ، والله تفاجات أن الفاتورة1160 ريال وحاسبت لأني قرفت في السوق وما فيني حيل أراجع لكن بذمة الكاشير إن أخذ شيء بغير وجه حق الله بيعطيني حقي منه لو مبالدنيا بالآخرة ، ولكن برضو يجب أن يكون الواحد معه آلة حاسبة أو على الجوال أ قطعة يشتريها يسجل سعرها وإذا أنتهى حط الجمع ويشوف الفرق إذا شطح الكاشير قل الله لا يهينك عيد من جديد لأنك حينها متأكد ..
شكراً على التذكر والله على الظالمين أخي العزيز ..

[سعــود]

اخي زهراني من الرياض شاكر لك طرح هذا الموضوع فهي صوره تتكرر كثيراً
ولكن يؤسفني ان اقولك أنا حدثت لي مع سعودي وابن جلدتي في كارفور فبعد أن انتهيت من شراء اغراضي وذهبت للكاشير وانتهى من حسابي بالصدفه وليس بعادتي للأسف ،،
راجعت الفاتوره فأجد71 ريال مضافه لي كقيمه لغرض لم اشتريه
فوراً رجعت للكاشير وبعد جدل كبير بيني وبينه قال لي انه بالغلط حسب لي قيمة كرتون بسكوت فاضي وركز على فاضي يعني ياليته مليان عشان اعذره واقول ماانتبه ،،
انا واحد من المغفلين اللذين يستغفلهم المتجردون من الأمانه وعد كم واحد عندنا لايفكر مراجعة فواتيره خصوصاً اول ماينزل الراتب ربما يكون 71 ريال مبلغ بسيط ولكن تتوقع جمع 71 ريال من كم شخص غيري ؟؟؟ ،،

خالص احترامي وتقديري وشاكر لك طرح الموضوع مره ثانيه ،،

[زهراني من الرياض]

اخوي ابو مراد واخوي سعود ..

سالفه الكاشير هاذي للاسف شي يحز في الخاطر خصوصا انهم سعوديين .. وجل من لا يخطيء .. الواحد مع الاستعجال والناس اللي تنتظر الواحد يتلخبط و يحسب بدل المره مدري كم ..

واعرف ناس يشتغلون في ذا الوظيفه وفي راسه ست ميه الف شغله .. << يكون عنده دوام ثاني غير هذا ..

والله ياواحد كسر خاطري شكله كان تعبان وحالته حاله رحمته وصرت كاشير بداله .. <<< بس لا حد يدري .. بيني وبينكم ..

انتو لو جربتو الشغله ترى تتطفش مووووت وتحزن بعد .. الاجانب تشتري من عندك بالالاف وانت يالسعودي ما يمديك ..

وبالنسبه للحساب اذا مو مضبوط اعتبروها صدقة لوجه الله << عاد لا تصيرون بخيلين .. << خخخخ امزح

شاكر لكم مروركم ..