قصة ( الفيتو والغريبة)

[أبو مراد الزهراني]

الفيتو والغريبة ...


هذه القصة حقيقة وليست من نسج الخيال .

ذات لليل إمرأة لاحظت أن زوجها يلعب بذيله على قولتهم المهم قامت واسرتها في نفسها وقالت ما لك الا حل يرضيه ويكون في نفس الوقت حلال ولن افعل مثله رغم قساوته وجفاءه معنا في البيت ..
قامت فتحت حساب في تويتر وحطت هذاك الإسم الدلع وطقت الصورة الي تخلي الرايح جاي
وهي تدخل على حساب زوجها وفلو وشوي كل ما كتب شي مفضلة وشوي كل ما كتبت شي مفضلة له واعجاب وشوي الا الرسالة انا معجب في ما تكتبين وشوي وهي تقول وانا مغرمة فيما تكتب وصرت اعشق صفحتك والرجال راح ملح
وكل يوم هلا واشتقت لك ولا ابيك تغيب عني احس نفسي في غابة موحشة وانت ونيسي وانت عمري وانت ذاتي وانت بداية حياتي ونهايتي بيدك ..
قال بعد عمري لا تقولين كذا انا معك ولآخر العمر معك تشكو له من زوجها تذهب به لما تلاقيه من معاناة وهو كذلك زوجتي وزوجتي وحط فيها كل قبيح ..
المهم وصلت ارسلي صورتك ارسلت صورة ما يحصلها في قوقل وخلته يلف خمس مرات حول نفسه ويصقع براسه .
طيب المقابلة قالت انا في حصار يا تصبر معي حتى اتخارج من زوجي يا تقول ما اقدر واكون لك من الشاكرين وفرصة سعيدة اني عرفتك وعرفت طيبة قلبك وحنانك ..
قال لالالا يا مهجتي ومن ملكتي فؤادي معك لآخر العمر قالت توعدني قال اوعدك ..
قالت اتفقنا ..
المهم بداء الشغل الزين ووصلت لنقطة الضعف المهم قامت قالت اجرب اشوف هو يحبني ولا لا ..؟
قامت ارسلت له رسالة قالت الحين انا يا روح روحي طالعة مع زوجي واهله ابيك تطلع عيالك اذا لي خاطر عندك ..
قال وين اوديهم قالت حبيبي اليوم اجازة صح قال نعم قالت خذهم عمرة لمكة اذا تحبني ..قال غالية وطلبك منفذ قالت توعدني قال والله اوعدك ..
وهو يقوم ويصيح فيها يا ام افلان قالت سم قال اليوم خاطري ضايق وش رايك نتوكل على الله على مكة ناخذ عمرة قالت شورك والي تامر فيه يا ابو فلان قال مشينا ..
من هنا عرفت ان الرجال المطيع للغريبة الي هي أنا ..
وبعد ما رجعنا بأسبوع قلت نبي نتمشا ونطلع والرجال ماىيخلينا نطلع ..
قامت قالت يا ابو فلان وش رايك نطلع نتمشا ونشم هوا ونتعشا برا قال مايمديني عندي سهرة مع الشباب قالت تكفى قال اقول انتهى وقام يصارخ قالت يا ابن الحلال طلعنا قال لا يعني لا وانتهى وهو ينفخ خشومه وعيونه قلت يا بنت مالك الا الفيتو ..
تركته نص ساعة الا طرنق يعني الرسالة وصلت سلام يا حب وياروح الروح ..رد هلا بعيوني ومهجتي قالت وش فيك احسك طفشان او زعلان كذا حسيت بقلبي مدري مجرد احساس ..
قال يا الله قلبك معي قالت اكيد احساسي معلق فيك .
قال ذي المقرودة تبيني اطلعهم يتمشون وانا مواعد الشباب سهرة وما لي خلق ..
قالت وتزعل نفسك عشان كذا حبيبي.
قال ايه ..
قالت طيب تحبني ؟
قال وعندك شك يا روحي ..
قالت لا ولكن اتأكد من معزتي ومحبتي في قلبك ..
قال انتي القلب ..آمريني حبي ..
قالت انا اعاني نفس المعاناة مع زوجي وزين انت تسمع لها او ترد عليها هذا ضرب اقول نطلع كف على طول ..
قال تنكسر يد الي تنمد عليك ..
قالت المهم اذا لي خاطر طلعهم والشباب لاحق عليهم تكفى..
قال من اجل عين تكرم مدينة قالت توعدني قال وانا قد وعدتك واخلفت قالت لا ولكن اطمئن .
هيا روح لأن عندنا ضيوف والله يعينني على تجهيز اكل وكنس وتعرف قال خلاص قلبي الله يعينك ..الحين بطلعهم ..
تقول رميت الجوال وقمت العب في الصحون وشوي الا هو عندي قال يا ام فلان لا تزعلين مني تريني اخطيت بحقك وابيك تسامحيني قالت مسامحك يا عزيزي وخلاص ما نبي نطلع الأهم راحتك ..
قال والله ثم والله غير نطلع اليوم ومشيكم وابسطكم ..
قالت لالا
قال انا حلفت لا تخليني اصوم ثلاث ايام ..
قال لالا خلاص دام حلفت توكلنا على الله ونفل ونروح وننبسط وعشاء ووناسة وداخلي يقول الله اكبر هههههههه
يعني الغريبة هي الي اقنعتك طبعاً ..أنا ..
قالت على ذا الحال سنتين ابي نروح ابي عمرة ابي نزور اهله واهلي استخدم معه الفيتو .

وسلامتكم ...

[إبن راشـــد]

أحفظ الله يحفظك................

[أبو مراد الزهراني]

له نهاية طبعاً سوف أوردها لاحقاً إن شاء الله ..
لكم التحية ..

[إبن راشـــد]

طبيعي
لكل شي نهاية
وما اجمل نهاية الخير و ما اصعب نهاية الشر
ما أجمل العيش في سعة بعيدا عن ضيق الخيانة و الخوف من الفضيحه حتى لو معنوياً...

[أبو مراد الزهراني]

كل خير اخي ابن راشد ولا بد أن نعلم أن للمرأة طرق تستطيع إنجاح حياتها مع الزوج من عدمه ..
شكراً لمداخلتك ..

[إبن راشـــد]

اقتباس: المشاركة الأصلية كتبت بواسطة أبو مراد الزهراني      كل خير اخي ابن راشد ولا بد أن نعلم أن للمرأة طرق تستطيع إنجاح حياتها مع الزوج من عدمه .. شكراً لمداخلتك ..

بعض الأزواج مافيهم حيله...
احدهم اتهم زوجته بالخيانه وعندما حضر حكم من اهله وحكم من اهلها أتضح بأنه هو الخاين الجبان.....

[يحيى محمد الزهراني]

ههههههههه عجل بسرد النهايه اكيد مأساويه
كيد الحريم دايم يجي محبوك بس ولله الحمد له نهايه
وعلى قول شاعر عسير اللي يقول فيه
((ياحليل اللي معلول وتعلق بمجرى))

[سيسيل الزهراني]

هههه زين تنبهون بعضكم لايصير لكم مثل ماسوته هالزوجه..ماكل النساء مثل كذا

وطريقه اكتشافها شينه ممكن فيه اساليب بديله افضل من كذا اذا وصلت لحد الشكوك
والغيره المذمومه والتفاهم مطلب للحياه الزوجيه واستقرارها.. والزواج موتقييد وضغط
على الزوج والتدخل في خصوصياته مثل تفتيش جواله ..

[شتآتـ]

الله لا يكثر من امثال هالزوج 😷
اسد ع زوجته وعياله وعند الغريبه نعامه .

عندما تُنزع مخافة الله ومراقبته في السر والعلن من قلوب اشباه الرجال يطلع لنا مثل هالنماذج القذرة .
الحرام ليس له اي مبرر .

[راعد الوسميه]

قصه جميله جدا

الشي اللي تملكه دايم تمل منه هذا امر لابد من التسليم به
احنا نحتاج ان ندخل الدين في علاقاتنا الاسريه