الحب والكره

[حسين المعنى]

الحب والكره وسط القلب كان اختلط

مثل المكينه اذا ماها خلط زيتها

يصير راعيه مثل الثاء بدون النقط

صحرى حياته ولا تنفعك لو جيتها

والعمر عنده سوات السير لامن فرط

تقلقك الايام عنده لو توحيتها

والعقل ديركت يرحل والفكر يلقط

والحال ينحل وروحه ينفقد صيتها

ورطه كبيره حليل انسان فيها ورط

وانا فريضه ولو هي كيف ماجيتها

حبيت عفت الذي غالي ولا ينسفط

بكل ماداخلي عايف وحبيتها

طيوفها للمشاعر ياوجودي سلط

من وين مارحت وافتني ووافيتها

كأن قلبي مع اعروقه لها ينشط

نشطت غشيم(ن)يتل الروح ويميتها

صيح لها الصمت والكتمان لين انشحط

وارتد الاحساس في روحي وحسيتها

متمكنه خافقي زعلان والا انبسط

الله على ايام راحت لو تناسيتها

ماهي بمتعوضه بالحس والا النمط

سنه مضت ماتعود لو تحريتها

توقف الشوق من شي وشي نشط

ذابت شعوري من اشواقي ولا قيتها

عالم خيالي وكلي في غلاها انربط

مجنون في حبها وان كان خليتها

مشاعر احساس وانفاس لها تختبط

لعيون معشوقتي لاشك عانيتها

لحمي تفتت وعضمي بالخيال انشعط

انشد جسمي وطاح ولا تمنيتها

ودي أتذكر وودي انسا وهذا فقط

اللي بدنيا الغرام اليوم خاويتها

وش عاد اشيله معي وش عاد اخلي واحط
من ديرت(ن)عامره قلبي غدا بيتها

[ألمحيط]

الاخ الشاعر حسين المعنى الراقي
ما شاء الله عليك يا مبدع
لله درك الله لا يحرمنا من تالقك
دمت بخير
اخوك المحيط