حقــــــــــــــــوق المرأه ، ‏باللهجه الحجازيه الجميلة ، يسلم فمك يا دكتورة

[الدبلوماسي]

حقــــــــــــــــوق المرأه



الدكتورة : ليلى صالح عزوز

‏باللهجه الحجازيه الجميلة



ما يرفع ضغطي شَي زَي كلمة حقوق المرأة .. وبالذات في السعودية .وهادي المشكلة طلعت متى؟

بعد 11 سبتمبر .... سبحان الله .. يعني كانوا من ألف وأربعمية سنه نايمين .. وفجأة كده صحيوا

وقالوا: وه ياندامة .. إيش هادا؟ أتْـرِنُّو إحنا لنا حقوق؟! مادام كده ...

الإنتخابات البلدية ليه ما نشارك فيها؟ وليه ما نروح هناك ونرقع بالصوت؟



يا أختي حلال عليكم البلدية كلها .. يعني إيش تبغوا تسووا؟

تحطوا ضوابط إصدار الرخص لمحلات الحلاقة مثلا؟

والا تناقشوا سفلتة الشارع اللي يودي على بيت أم إبتسام؟

والا ليه الشارع الفلاني ما فيه كوفيرة مغربية وكل اللي فيه مصريات؟

يا أختي ريِّحي راسك . اذا كثير من الرجال ما سوُّوا حاجه ... بالله عليكي حتسيبي بيتك وعيالك وشغلك ... عشان تناقشي مشروع إنتخابي؟ هادا من تمام الفضاوه..

طيب قولوا لوحْدَه زواج أختها الليلة: بلاش تروحي للكوفيره اليوم يا مدام وتعالي نناقش حقوق المرأة أو نحضر المجلس البلدي و نتخذ قرارات مهمة .. وأترك لكم جوابها .. إيش يكون

أما عن حقوق المرأة في السعودية .. فياسيدي الست هنا لها حقوق وواجبات ما تتنازل عنها.

مثلا: في بلدان كثير عربيه وأوروبيه تلاقي شحط طويل عريض جالس في الباص ...وقدامه وحده في الشهر التاسع واقفه على رجولها وشايله طفل تاني على كتفها .... إن الشحط يتحرك؟ .. أبدا...

إن الثور يحس؟ .....لايمكن.

لكن هل يمكن يحصل هادا في السعودية؟ أبدا ..

واللي يبغى يجرب.... الطريق قدامو .... يا عمي العملية كلها دلع حريم في دلع حريم ... رايح أعطيكم بعض الأمثلة وقولوا لي مين اللي آخِد حقُّوقه بالكامل وزياده؟

وهل عندنا المرأة متساوية مع الرجل .. والا هي أحسن مِنُّو؟

قال حقوق المرأة .. قال.

منظر عام

رجال محترمين زي الورد واقفين أمام صراف في بنك .. وتِجي أختنا في الله

)اللي يقولو إنها مهضومة الحقوق)

تتقدم للصراف (ِatm)مباشرة ولا على بالها من الطراطير اللي واقفين من ساعات ..

وبعضهم مستأذنين من عملهم. طيب ليه ما توقِّف تِمسك سِرا ورا عشرين بنغالي... وثلاثين باكستاني ... وخمسين سعودي... واثنين معقبين معاهم شوية فواتير مقاس إكس لارج

.. وإذا أحد كلمها وقال لها أتفضلي يا أختي ترد عليه وتقول: لا، معليش. المرأة زَيّ الرجال

.... خليني في الطابور .... زَيِّي زيكم؟! .... ليش ما تقول كده؟! ... والا هي تماحيك وبَس !

ونفس المنظرفي الجوازات .... والأحوال ... والتأمينات .. ويقدر أحد... يقول إنه من ظهر أبوه .... يفتح فمُّه؟ ... على طول يسمع العبارة الشهيرة ... ( عيب عليك .... إنت ماتستحي؟ .. هذه حرمة...إنت ما عندك أهل ...((!ويضطرالراجل إنُّه ينكتم ويسكت .. بل إن المرأة تشفع للراجل جوزها عشان يتقدم على الرجال الباقين. في المطار .. مثلا .. ما تشوفهم يطلِّعوا العوايل أوَّل .. وبعدين بقية الركاب؟

قال حقوق المرأة ... هههه!

اقتصاديا

شوف الراجل.. السبع... الغضنفر.. المفتري...له ثوبين أوثلاثة في السنة .. يروح بها العمل، ويحضر بها عزايم وزواجات، ويقابل بها كبار المسؤولين، الخ، الخ، الخ...

والمرأة بسلامتها .. بقيمة أدوات مكياجها فقط ...

تقدر تفتح محل خياطة رجالي محترم . ويا ريت تحط من مكياجها في البيت.. لأ.

دا بَس للخروج ... وقيمة صباع روج والا علبة بودرة تساوي قيمة جوال جوزها

.. وكمان ازيدك من الشعر قصر .. مو بيت .. من حقوقها فستان لكل فرح. و مكياج.

وكوفيرة..وجزمة..وشنطه. وكمان خُدوا هادي .. سابع بنت عمي. ملكة أخت جارتنا . ولازم هدية. واللطخ يدفع .مو مهم الفلوس جات من فين .. المهم يدفع .. والدنيا ممكن تنقلب على الراجل واللي خَلَّفوه علشان موضوع (مهم وحيوي زي كده.(

قال إيه! حقوق المرأة.

نفسيا

الزوج مطالب يكون أربعة وعشرين ساعة رومنسي ومبتسم، ولا يبقى جلف وإبن ستين في سبعين..

ويعني إيه عنده مشاكل في العمل؟! والا أقساط متأخره؟! والافواتير؟! والا مقاضي ما يعرف كيف يجيبها؟!

مو مهم ..واجب عليه إنه يرجع من العمل للبيت مروِّق ومبسوط وبَس ... كإنه كان في شرم الشيخ مصيف مع نانسي عجرم .. ((مجرد مثل .. تف .. بره وبعيد(( ....

والست بسلامتها من ساعة ما يرجع من عملو .. وقبل ما يفصخ حوايجو: شوف بزورتك (لاحظوا .. بزورتك) طفَّشوني .. إيش رأيك نغير غرفة النوم؟ التلفون ما فيه حراره ...

جاتني رساله على الجوال يقولوا الفاتوره طلعت .. أَلحق سّدِّدو قبل ما يوقفوه عن الخدمه ... ... .. ... ومع هادا كُّلو ..لازم يبقى رومانسي.

بينما هي وبكل سهولة تصحى بسلامتها في الظُهر...وتجد الكارثة الكبرى....يوه ... ما عندنا صلصه ...وبكل رقة تتصل...ألو ألو ...أبو خالد موجود؟ ممكن أكلمه لو سمحت؟ ألو .. إيوه... أنا ..

حتكون مين يعني؟... المهم ... جيب معاك غدا ... ماهو إنت يا فالح نسيت تجيب صلصه معاك أمس.

ولإنه موفاضي.. و قرفان من العمل.. يصدق المسكين إنه هو إللي نسي ويقول بكل شجاعة ..... طيب.

وفوق هذا كله آخر السنه: طفشانه ....فين حتودينا ...والله بنت خالتي راحت أمريكا .. وبنت عمي ما تصيف إلا فْ أوروبا.... يا عيني علينا إللي ما نروح غير يا مصر... يا سوريا ... والسنة اللي غيَّرنا فيها ... رحنا ماليزياوماتقول شوف زوجة فلان ايش عملت لزوجها لانه من المحضورات .



وفي رمضان: تعبت ....أوف .....إنت داري عن حاجه؟ أنا أبغى خدامة... أنا خلااااااااص .. ومن ثالث يوم رمضان ....مقاضي العيد من جده ...أختي جابت ملابس لها ولعيالها .. إيش أقولَّك بس ... وخُد مشاوير لليييييييييييل ... والراجل المسكين لما ينزل السوق مع مرته ما يقدر يشتري ولااااا شَي لنفسو، لأنو طول الوقت ماشي وراها من دكان لدكان، وشايل زنابيل إلين ما كتفو يتخلع. وهي تطالع فيه وهو يتطوَّح من ثقل الزنابيل .. ولا تقول لُو فزعه .. حتى لو بالكِدِب. وآخرتها بعد ما يرجع البيت تقول لو إنها لِسَّه ما أشترت ملابس العيد!!!!!! وإذا فكَّر ينزل السوق لحالو عشان يشتري شي لنفسو ... على طول يكون مشبوه .. إيش ينزلك لوحدك وسط الحريم؟ .. طيب إنت مو كنت معايا في السوق .. أحد قال لك لا تشتري؟

قال إيه؟ ... حقوق المرأة.

شرعا

المرأة لها حظ من أبوها .... وحظ من زوجها . هادا غيرأمها .. وأخوانها ... وأبناءها .. والراجل مطالب إنو هواللي يصرف عليها مهما كان عندها فلوس.

وثانيا: الرجال لازم يروحوا للمسجد خمس مرات في اليوم .. جمع وجماعات . حر وبرد .. ليل وصبح .. لازم يروحوا ... بينما الست تصلي تحت المكيف ... في غرفتها... وأجرها زي الرجال تماما .... ياعيني .. يا عيني ..والله الإسلام أعطاكم كتير .... وياريتو يِبان فيكم

[ابو عبدالله العمري]

المقال دا برد قلبي بصراحة ....

اي والله ليت يبان فيهم ....

ماعاد الا السواقة بس ويصيروا زي الرجال في كل شي ...

شكرا لك على المقال الجميل دا

[نور الجنوب]

لا كلام جميل ولا شي ليش تعمم الحريم كلهم زي كذا والله احنا حريم مالنا كلمه لامن زوج ولا من اهل ولامن انتخابات
والله انتو يا الرجال يليت يثمر فيكم .في البيت منطقين لا خرجه ولا ندره وانتو اذا طفشتو خرجتو محل ما تبغو .واحنا في البيت ربي العيال وغسيل ملابس ومواعين وتنضيف بيت وكوي وذاكري للعيال واطبخي وسوي فطور وغدا وعشاء وقهوه وشاهي وتعالي شوفي ولدك ايش سوا في الحمام وتعالي طقيلي ضهري ويليت لنا يوم واحد مفتوح حتى مالنا ايجازه من عملنا اليومي لاكن انتو خميس وجمعه راحه لكم اقول كسرو لحي الشيطان جبتلي الضغط من موضوعك
ولا تنسى يا اخ الجنه تحت اقدام الامهات .ليش ماسالت نفسك .لان المراة تتعب اكثر من الرجل واذا عن الصلاه تروح المسجد وتصلي فروضك في المسجد حتى في المساجد مكيفات بس يليتك تريح نفسك من الهروج

[الدبلوماسي]

اقتباس: المشاركة الأصلية كتبت بواسطة نور الجنوب      لا كلام جميل ولا شي ليش تعمم الحريم كلهم زي كذا والله احنا حريم مالنا كلمه لامن زوج ولا من اهل ولامن انتخابات والله انتو يا الرجال يليت يثمر فيكم .في البيت منطقين لا خرجه ولا ندره وانتو اذا طفشتو خرجتو محل ما تبغو .واحنا في البيت ربي العيال وغسيل ملابس ومواعين وتنضيف بيت وكوي وذاكري للعيال واطبخي وسوي فطور وغدا وعشاء وقهوه وشاهي وتعالي شوفي ولدك ايش سوا في الحمام وتعالي طقيلي ضهري ويليت لنا يوم واحد مفتوح حتى مالنا ايجازه من عملنا اليومي لاكن انتو خميس وجمعه راحه لكم اقول كسرو لحي الشيطان جبتلي الضغط من موضوعك ولا تنسى يا اخ الجنه تحت اقدام الامهات .ليش ماسالت نفسك .لان المراة تتعب اكثر من الرجل واذا عن الصلاه تروح المسجد وتصلي فروضك في المسجد حتى في المساجد مكيفات بس يليتك تريح نفسك من الهروج

اختي نور الجنوب ,اسعد الله اوقاتك بالخير.
ايش اللي مضيق صدرك في الموضوع ؟؟
اتمنى تعيدي قراءة الموضوع مرة اخرى.
بالعكس هي تدافع عنكن.

## لو سمح لك ان تقومي بعمل الرجل , تتوقعي انك قادرة على ذلك ؟!!
لك أرق التحايا

[αиα ω вѕ]

حقوق المرأه ؟!

اكيد في نساء كثير في السعوديه حقوقهم مهضومه .. وكون في ناس تطالب بحقوق الانسان / المرأه .. فهذا شئ في صالح المجتمع .. للاسف المرأه عدوه نفسها .. هناك حقوق للمرأه شرعها الاسلام وهضمها المجتمع .. فعلى المرأه معرفه حقوقها اولا .. ثم المطالبه بها ..

[عبد الكريم العدواني]

مشكوووووور والله يعطيك الف عافيه.

[نور الجنوب]

يا الدبلوماسي والرجل يقدر يقوم بعمل المراة .الرجال هذا عملهم .عليه النفقه والله امره بااشياء كثيره
يكفي الحرمه في حملها وتعبها في البيت وتربية العيال .
وبس انا قرات الموضوع لاكن .ولا شي سار خير
شكرا على موضوعك