اروع ملف للكاب كيك حلا X حلا

[الهنوووف]

اهليييييييييييييين بأحلى و أروع بنـااااااااااات
اللي مهما اشغلتني الدنيا عنهم احن واشتاق لهم
لدرجة اني افرح اذا جربت طبق جديد واعجبني علشان القى عذر اقابلكم فيه

موضوعي اليوم كله حــلا بـحــلا

واتمنى من كل قلبي انه يعجبكم ويكون عند حسن ظنكم


قبل ما ابدا بالحلايات فيه اشياء مهمه بذكرها ،،

** الشكولاته اللي استخدمها هيfaly من شركة العطير
تحصلينها باغلب السوبر ماركت وعن تجربه هي افضل نوع استخدمته وهذي صورتها :



و مكتوب عليها كم جرام وزنها ، انتِ شوفي اللي عندك كم مكتوب عليها وقدري على حسب المطلوب بالوصفه ..
- في حالة ذوبتيها وتكتلت عليك فمعناته وحده من الثنتين :
يا انه جاها مويه من الحمام المائي وهذا اكبر شي يخرب الشكولاته
او انها قديمه فماتذوب زين << غالبا تصير مع الشكولاته البيضاء ،،
والحل هنا انه تضيفين عليها شوي زيت بتلقينها تذوب معاك طوالي

** في وصفات الفروستينغ اللي بالاخير ..
ضروووووري تستخدمين السكر البودره الجاهز ، مو اللي انتي تطحنينه في البيت
لانه مهما طحنتيه ونخلتيه ماراح يعطيك نتيجة السكر الجاهز وماراح يذوب معك



Chocolate Cups **</B>

طريقه جديده لتقديم الشكولاته
عليها طعم خرااااااافي لا يمكن احد يصدق انها شغل بيت
مع انه مافيها اي منكهات قويه او سكر لكن ماتتخيلين الطعم اللي بيطلع لك

** المقـاديـر ..
شكولاته خام غامقه + جالكسي لتلبيس الاوراق
100 جم شكولاته خام غامقه
4 م ك جبنة فيلادلفيا
1 م ص سكر بودره

** الطـريقـهـ ..
اول شي نلبس القوالب بالشكولاته ،،
وبذكر لكم طريقتها بالتفصيل الممل لانها هي اكثر شي انسئل عنه عالخاص
ذوبي شكولاته خام ومعاها شوي جالكسي على حمام مائي ،
والسبب هنا لانه لو بتحطين جالكسي لحاله صح انه مررره لذيذ
بس عيبه يذوب بسرعه ويوسخ اليدين
والشكولاته الخام لحالها كويسه وماشي حالها بس الجالكسي يخفف شوي من مرارتها
مالي مقدار معين بخلط الثنتين ، على حسب اللي عندي واللي احصله ،،
بس غالبا لكل 100 جم شكولاته خام احط حبة جالكسي وحده..
جيبي الورق وبملعقة الشاي حطي شوي بالورقه وبظهر الملعقه ابدي اطلعي عالاطراف حتى تتغطى :



اذا حسيتي الطبقه مره نحيفه وبغيتي تثقلينها << خاصه ان بغيتي تشيلينها عن الورق بعدين ،،
بعد ماتجمد ارجعي عيدي الخطوات نفسها علشان تشكل طبقه عريضه ،
ودخليهم الثلاجه يبردون وممكن تتفرزن لوقت طويل من دون ماتتغير

نجي للحشـوه ::
ذوبي مقدار الشكولاته الخام على حمام مائي حتى يذوب تماما..
- ممكن اذا انتي حابه تضيفين لها شوي نسكافيه يعطي الشكولاته طعم لذيذ -
في هالوقت اخلطي جبنة الفيلادلفيا مع السكر البودره مضبوط حتى مايصير فيها كتل
صبي عليها الشكولاته واخلطيهم ، بتحسينها ثقلت مره والملعقه بصعوبه تتحرك ،
وحتى لو لقيتي فيها كتل بسيطه مو مشكله ، تتروح مع التشكيل



حطيها بالكيس حق التزيين وشكليها فوق الاوراق الملبسه



وزينيها من فوق بالمكسرات اللي تحبين ، ودخليها الثلاجه تبرد حتى وقت التقديم
من جد ماتتخيلون ان الطعم اللي بتذوقونه بس شكولاته وجبن











Snow Balls **</B>

بسكويت شكولاته مرررره لذيذ وطعم
و تغيير عن الكوكيز العادي اللي يتصلح دايما ..

** المقــاديــر ..
خليط كوكيز بيتي كويكر ابيض
اصبع زبده مذوبه
بيضه
ربع كوب دقيق
ربع كوب كاكاو بودره
نصف كوب مكسرات مجروشه << استخدمت جوز
سكر بودره للتغطيه
شكولاته هيرشي كيسز ساده مثل اللي بالصوره :



** الطـريقــهـ ..
خوذي خليط الكوكيز الناشف وانخليه من الشكولاته اللي فيه
- لو بتحصلين علبة كوكيز بالسكر فهو افضل لكن للاسف نادرا ماتنلقى -
اخلطيه مع النواشف اللي بالمقادير بعدين اعجنيه بالزبده والبيضه حتى تطلع معك عجينه متماسكه ،
جيبي شكولاته هيرشي وخوذي شوي من العجينه ولبسيها فيها وحاولي قد ماتقدرين تكون طبقه نحيفه مررره



وحطيهم بصينية مدهونه بالزيت ودخليهم الفرن على درجة حرارة 350 لمدة 8 - 10 دقايق بس
انتبهي لاتطولين اكثر او تنتظرينها تحمر او تقولين لسه لينه ترى لو طولت بتصير زي الحجر وماتقدرين تاكلينها
بعد ماتطلع بخمس دقايق وهي حاره قلبيها بسكر بودره ..
واتركيها تبرد وارجعي قلبيها مره ثانيه حتى يمسك السكر فيها مضبوط ،،
احفظيها برا الثلاجه بعلبه مسكره زين ،، وبالعااااااافيه

[الهنوووف]

Chocolate Cheesecake **</B>

هذا الشيء اللي اعترف وبكل صراحه ان الموضوع كله علشانه
شي كلمة اجراااام قليله بحقه ، لايمكن يمر اسبوع بدون ما اصلحه واستمتع بالطعم
وماياخذ وقت بالتصليح كيكته مو مثل الكيك العادي ، تطلع لينه وتذوب بالفم وطعمممممه
والحشوه حكي ثاااااااني والجاناش حكااااااااايه
ياويلكم بعد كل هالمدح ماتصلحونه


** المقــاديــر بالاكواب المعياريـهـ ..
كوب دقيق
نصف كوب كاكاو بودره مُرّه
1 ملعقة شاي B.P
1 ملعقة شاي ملح
ثلاث ارباع اصبع زبده لين
ثلاث ارباع كوب سكر
بيضه
ثلثين كوب حليب سائل بدرجة حرارة الغرفه

** الحشــوهـ ..
100 جم جبنة فيلادلفيا << ثلث العلبه اللي حجمها 300 جم
2 م ك سكر بودره
فانيليا
2 م ك شكولاته اي نوع تحبين - غامقه او بالحليب - مقطعه قطع صغيره

** جـانـاش الشكـولاتـهـ ..
100 جم شكولاته خام غامقه ومقطعه صغار
نصف كوب كريمة خفق
نصف ملعقة شاي نسكافيه او اسبريسو

** الطريقــهـ ..
وزعي الاوراق بصينية الكب كيك ،،
اخلطي ( الدقيق + الكاكاو + الملح + B.P )
في العجانه او بالمضرب الكهربائي اخلطي الزبده والسكر مدة دقيقه او حتى يبهت لونهم ،،
اضيفي عليهم بيضه واخلطي حتى يتجانسون ..
اضيفي عليهم نصف كمية خليط الدقيق واخلطيهم زين بعدين اضيفي الحليب ،
واذا اختلطوا كلهم اضيفي باقي مقدار الدقيق واخلطيهم سوا واتركيه على جنب..
** الحشــوهـ ..
اخلطي مقادير الحشوه كلها مع بعض مضبوط حتى تروح كتل الجبنه ،،
في اوراق الكب كيك حطي شوي من خليط الكيك بعدين الحشوه بعدين غطيها بطبقه من الكيك ..
- كلما نحفتي طبقات الكيك وكثرتي من الجبن صارت ألذ -



ودخليها الفرن على درجة حرارة 350 مدة 20 دقيقه وطلعيها واتركيها تبرد ..

** طريقـة الجـانـاش ..
سخني كريمة الخفق على النار حتى تقارب الغليان بعدين ارفعيها
واضيفي عليها الشكولاته والنسكافيه وحركيهم سوا حتى يذوبون بالكريمه
واتركيها تبرد شوي حتى تثقل وصبيها عالكب كيك
بالنسبه لي احب اكلها بارده فأدخلها الثلاجه ، خيتو تقول انها الذ وهي بدرجه حرارة الغرفه
انتِ جربي وشوفي اللي يعجبك اكثر
جربيها وصدقيني بتدعين لي من لذتها ،،














The Black Forest Cupcake **

اسميها سربرايز كب كيك لانه ماتتوقعين الاشياء اللي جواتها وانتي تاكلينها
شيك مره بالتقديم ولذيذه ، وافضل شي تتقدم مع العصير

** المقــاديــر ..
خليط كيك شكولاته بيتي كروكر تعملينه مثل مو مكتوب عالكرتون
او اي كيك شكولاته تضبطينه

** الحشــوهـ ..
250 جم جبنة فيلادلفيا
بيضه
2 م ك سكر
فانيليا
باي فيلينق فراوله او كرز

** للتزيـيــن ..
كريمة خفق
جبنة فيلادلفيا او ماسكربوني
سكر بودره
فانيليا

** الطريقــهـ ..
اخلطي مقادير الحشوه بالخلاط كلها مع بعض ،،
في اوراق الكب كيك صبي شوي من خليط الكيك بعدين حطي عليه ملعقه كبيره من الحشوه البيضاء
وحطي عليها شوي من الباي فيلينق وغطيها بشوي من خليط الشكولاته ..



ودخليها الفرن على درجة حرارة 350 لمدة 20 - 25 دقيقه ..
وطلعيها واتركيها تبرد ،،
بالنسبه للتغطيه : خفقت كريمة خفق بالعجانه حتى ثقلت وتماسكت ،
خلطت شوي جبن مع شوي سكر بودره وفانيليا << مالي مقدار محدد ولا اقيس بس اقدر من عندي
اخلطيهم زين حتى ينعم الخليط وتروح الكتل واضيفيه عالكريمه وبالملعقه << انتبهي لاتستخدمين الخلاط او المضرب
قلبي بس بشويش كأنك قاعده تثنين الخليط على بعضه علشان ماتسيح الكريمه ..
وحطيها بكيس التزيين وشكليها عالكب كيك وزينيها بالفراوله او الباي فيلينق او الشكولاته المبشوره
ودخليها الثلاجه تبرد حتى وقت التقديم وبالعااااااافيه















Chocolate Chips **

حلااااااااااا مرررررره سهل وينفع للزنقات ، فكرته كلها بنوع الشكولاته المستخدمه

** المقــاديـــر ..
علبة شكولاته شيبس زي اللي تشوفونها بالصوره



احصلها غالبا فمحلات باجه حقت الفصفص او عند الحمود
بسكوت شاي مطحون
بينت بتر
حليب نستله

** الطريقــهـ ..
قبل ماتبدين تشتغلين الافضل تكون الشكولاته موجوده بالثلاجه علشان تقدرين تشتغلين عليها ..
اخلطي البسكوت مع البينت بتر والنستله حتى يطلع لك خليط ناعم وسايل شوي ..



انا حطيته بكيس التزيين اسهل لي بالتوزيع ، وصبي منه شوي فوق شرائح الشكولاته ..



وغطيها بطبقه ثانيه من الشكولاته واضغطي بس بشويييش علشان ماتنكسر الشكولاته ودخليه الثلاجه حتى يبرد ،،
وقدميه وبالعااااااافيه

[الهنوووف]

الحلايين الجايات سبق وقدمت مشابه لهم بمواضيعي اللي قبل ،،
لكن هذي طرق مختلفه وبصراحه ألذ من اللي قبل


Mini Apple Pie **</B>

عجينتها تفرق عن الباي العاديه ، تنفش مره لدرجة ان اللي ياكلها يحسبها كيك محشي مو باي
وطمعها يشبه البيتي فور شوي

** المقــاديــر ..
** العجينــهـ :
كوب ونصف دقيق منخول
1 م ص B.P
بيضه
اصبع زبده لين
نصف كوب سكر بودره
4 حبات جبن مثلثات
ذرة ملح

** الحشــوة ..
2 تفاح مقشر ومبشور
1 م ك قرفه
2 م ك سكر
عصرة ليمونه

** التغطيــة ..
بيضه
4 حبات جبن مثلثات
نصف علبة قشطه
فنجال قهوه سكر
فانيليا

** الطريقــهـ ..
ندهن قوالب الميني كب كيك بالزيت ..
نعجن مقادير العجينه كلها سوا ونلبس فيها القوالب ،،
نخلط مقادير الحشوة على النار حتى يذوب التفاح وتنشف شوي المويه اللي فيه ونحط شوي منه بكل قالب ..
نخلط مقادير التغطيه بالخلاط ونصب شوي فوق التفاح بس لاتكثرين لانها بتنفش بالفرن ،،



دخليها الفرن على درجة حرارة 350 حتى تتحمر من تحت - ماتاخذ وقت طويل -
وحمريها من فوق وطلعيها واتركيها تبرد ،،
بعد كذا زينيها من فوق باللي تحبين من انواع الباي فيلينق او المربيات ..
اطعم شي معاها البلوبيري بس انا ماكان عندي فحطيت مربى فراوله وكان مره لذيذ برضه
وبالعااااااااافيه












Mini Cheesecake **</B>

شي اتعب وانا اقول يواااااااجه وراااااااااقي بالتقديم
كل نكهه لها طعم مختلف واروع من الثاني

** المقــاديــر ..
علبة بسكوت شاي مطحون
اصبع زبده << استغني عنها واحط بيالة شاي ثلاث ارباعها زيت والباقي مويه
2 م ك قشطه

** الطبقـة البيضـاء ..
6 حبات جبن كيري
علبة قشطة
علبة حليب نستله كبيره
2 ظرفين دريم ويب

** التغـطيـهـ ..
علبة قشطة
ظرف دريم ويب
علبة حليب بوني او ابو قوس
علبتين جيلي اي نوع تحبين
1 ك ماء مغلي
1 ك ماء بارد

** الطريقــهـ ..
اعجني مقادير الطبقه الاولى ولبسي فيها الاوراق الصغيره ..
- الافضل انك تشتغلين عليهم وهم بصينية الميني كب كيك علشان يتماسك مضبوط -



اخلطي مقادير الطبقة الثانيه بالخلاط وصبي عالبسكوت بس لاتملينها ودخليها الثلاجه او الفريزر اذا كنتي مستعجله ..



نجي للطبقه الثالثه ،،
انا استخدمت علبة جيلي ليمون وعلبة جيلي كرز
اخلطي اول شي الدريم ويب والحليب والقشطه سوا بعدين اقسميهم على صحنين ،
ذوبي كل ظرف جيلي بنصف كوب مويه مغليه بعدين اضيفي عليه نصف كوب ماء بارد ..
واضيفيه على نصف خليط الدريم ويب واخلطيهم زين ،،
انا اخذت شوي من خليط جيلي الليمون وحطيت عليه ملون طعام اخضر ..
وصبي شوي من الخليط على التشيز كيك ورجعيهم الثلاجه يبردون حتى وقت التقديم .
وزينيهم باللي تبغين ،،
اكيد الافضل تزينينهم بقطع صغيره من الفواكه بس انا كنت مستعجله فجبت سكر
وحطيت عليه الوان طعام ورشيته فوق التشيز كيك ،
بس عيبه جلس شوي شكله يجنن بعدين ذاب ولا كأني مسويه شي
وبالعااااااااااااافيه








** ملاحظااااااااااااااااات هااااااااااااااااااااامه ::
~ مقدار الطبقة الثانيه والثالثه مررره كثير ، انا سويت نصف المقدار وصلح لي 40 حبة ميني تشيز كيك ..
~ اذا كنتي بتاخذينه برا البيت افضل انه تضيفين شوي جيلاتين مذوب بمويه حاره للطبقة الثانيه علشان تتماسك زين وماتسيح مع الطلعه والطريق
~ اول مره سويته اشتغلت نصف المقدار والاوراق بصينية الميني كب كيك والنصف الثاني بصينيه عاديه
وطلع فرق بالشكل ، اللي بصينية الكب كيك طلع مرتب مررره واللي بصينيه كبر شوي حجم الورق وبعضها ساح من الطبقه اللي فوق ..

[الهنوووف]

Cupcake Frosting **</B>

مين مننا ماوصلته حمى الكب كيك وتزيينها والابداع فيها ؟؟
كثير بنات يسألوني عالخاص ويستفسرون بالمجلس عن افضل طرق تزيين الكب كيك ..
بردي هذا بذكر اشهر الطرق للتغطيات وصور من تطبيقاتي لهم ,,
ومميزات وعيوب كل طريقه منهم علشان تشوفين اللي يناسبك
فتحملوني لو كثرت بالكلام وطولت بالتفاصيل ..

في البدايه بالنسبه للكيك نفسه انا استخدم حبيب قلبي خليط بيتي كروكر الجاهز للكيك بانواعه ،
اضيف عليه 3 م ك دقيق واصلحه مثل مو مكتوب عالكرتون ..
بصراحه هي الذ شي للكب كيك .. طري مره وسهل وممكن تصلحين نصف مقدار الخليط اللي
بالكرتون
والباقي احفظيه لوقت ثاني اذا ماكنتي باغيه كميه كبيره


1/ كـريمـة الخـفـق ..
طريقتهـا :
اخفقي الكريمه بالعجانه او بالمضرب الكهربائي حتى تثقل وتتماسك
ويفضل انه تحطين الوعاء اللي بتخلطين فيه والمضرب بالفريزر 10 دقايق يجمدون علشان تتماسك فيهم الكريمه ..
وحطي في بالك انها بتاخذ وقت طويل حتى تثقل - تقريبا 4 دقايق -
بعد كذا اضيفي عليها شوي سكر بودره وفانيليا وقلبي بشويش بالملعقه ،،
ممكن تضيفين عليها ملونات طعام او النكهه اللي تحبين - جيلي او مربى او كريمة بيتي كروكر او جبن فيلادلفيا او اي صوص حالي عندك -
بس مثل ماقلت واكرر بعد ماتثقل الكريمه لما تضيفين لها اي شي استغني عن الخلاط وبالملعقه استخدمي طريقة الثني ،،
والا تتسيح الكريمه ومافيه امل ترجع تجمد مره ثانيه ..




مميزاتهـا :
~ اسهل الطرق لتزيين الكريمه واخفها لانه مافيها دسم ابد
~ وبالنسبه لي طعمها هو الاول بلا منازع

عيوبهـا :
~ مو كل الناس تجمد معاهم الكريمه مع الخلط << واتمنى اعرف السبب
~ فيه بعض انواعها طعمه كأنه حليب بيخرب عليك الكيك
~ لازم تتقدم اول ماتطلع من الثلاجه حتى ماتسيح شوي الكريمه
يعني ما افضل انه تستخدمينها اذا كنتي بتاخذين الكيك معاك برا البيت الا ان كان المشوار قصير ،،
~ مدة خفقها مره دقيقه ، لو خفقتيها اقل من المطلوب صارت سايله شوي وماتشكلت معك ،،
ولو زدتي مدة خفقها زياده عن المطلوب تحولت لزبده وتكتلت وخربت عليك ..



2/ الـدريـم ويـب ..
طريقتـه :
اخلطي ظرف دريم ويب مع بيالة شاي حليب بااااارد حتى يثقل ..

مميزاتـه :
~ ماله مميزات عندي بصراحه
لاني ما احب نكهة الدريم ويب لحالها احسها مره قويه
وانا من الناس اللي مهما خلطت الدريم ويب مايجمد معي كفايه للتزين والتشكيل

عيوبـه :
نفس عيوب كريمة الخفق ...




3/ Buttercream Frosting ..
مقاديرهـا - تصلح تقريبا 30 حبة كب كيك - :
3 ك سكر بودره
1 اصبع زبده لين
1-3 م ك كريمة خفق
فانيليا

طريقتهـا :
في العجانه او المضرب الكهربائي اخلطي الزبده والسكر لمدة 5 دقايق او اكثر ،،
في البدايه بتحسين كمية السكر مره كبيره وماراح ينخلط بس اصبري انتِ عليه شوي وبينخلط تمام
بعدين اضيفي الفانيليا ، واذا حسيتيها ناشفه شوي اضيفي شوي كريمة خفق او حليب سايل واخلطيهم سوا ..
- لاتقولين كمية السكر كبيره بقللها او تذوقين الخلطه قبل لاتبرد وتحوم كبدك من كثر ماهي حاليه ، ترى بمجرد ماتبرد ماتتصورين كيف بيتغير طعمها -
بعدين اضيفي الملونات اللي تبين وشكليها مثل ماتبين ..








* بالنسبه للزبده افضل انه تستخدمين زبدة نادك لانها مو صفراء مره مثل المراعي ،،
و في الهايبر ماركت شي اسمه shortening يجي بعلبة حديد جنب السمن والزيت ..
مثل الزبده بس لونه ابيض واخف من الزبده بكثير ممكن تستبدلين فيه الزبده بهالطريقه ..



مميزاتهـا :
~ متماااااسكه لاقصى درجه وسهل مره تشكيلها
~ طعمها لذييييذ وماتسيح مهما طولت برا الثلاجه << الا لو صارت بحر شديد
يعني مناسبه جدا اذا بتاخذين الكب كيك معاك لاستراحه او بتبيعين فبازار او ملتقى
~ ممكن تضيفين لها النكهه اللي تحبين ،،
هنا بعد ماصلحتها ذوبت 100 جم شكولاته خام فحمام مائي بعدين تركتها تبرد شوي
وبالتدريج مع الخلط اضفتها على البتركريم وطلع فروستينغ ألييييييييم




عيوبهـا :
~ دسمه جدااااااا وثقيله
~ احيانا تكون نكهة الزبده واضحه فيها ..
~ اذا استخدمتي الزبده مو الـshortening فماراح تحصلين على لون ابيض للفروستينغ ، بيطلع لك على صفار شوي ..



4/ Meringue Buttercream
مقاديرهـا -تصلح تقريبا 20 حبة كب كيك - :
3 بياض بيض
نصف كوب سكر
اصبع ونصف زبده لينه
فانيليا

طريقتهـا :
على حمام مائي اخلطي بياض البيض والسكر بس لاتخلينه يلمس المويه خليه على بخار الماء بس
- لازم يكون الوعاء اللي بتخلطين فيها ناشف زين مافيه ولا نقطة مويه -
وانتبهي لايجي عليه من موية الحمام المائي والا بيخربه عليك
واستمري بالخلط حتى مايستوي عليك بياض البيض لمدة 5 دقايق تقريبا او حتى يسخن الخليط ويثقل شوي مثل ماتشوفون :



ارفعيه من النار و بالخفاق الكهربائي او العجانه اخلطيه وهو حار لحد مايتضاعف حجمه ويصير كأنه كريمه بيضاء :



اضيفي عليه الزبده المقطعه لمربعات وارجعي اخلطي وهالمره بتاخذ وقت من 7 - 10 دقايق
وبالاخير اضيفي الفانيليا واخلطيه وبعد كذا الوان الطعام وشكلي مثل ماتحبين ..











مميزاتهـا :
~ ألذ بكثييييييير من البتر كريم اللي فوق
~ اقل حلاوه منها ومايبين فيها طعم الزبده
~ طعمها نفس طعم الفروستينغ اللي عالجاتوهات اللي بالمحلات
~ ومثل البتر كريم ، متماسكه جدا وماتذوب بسهوله
وتشرف وتواجه وين ما اخذتيها معك ...

عيوبهـا :
~ العيب الوحيد فيها ان خطواتها تاخذ وقت مو مثل الطرق اللي قبل
بس تستاهل هالتعب ،،
~ ممكن بعض الناس اللي ماتحب البيض ماتفكر تسويها بس حطي فبالك انه البياض بيستوي على الحمام المائي ،،
غير انه اتحدى اي احد يذوقها يعرف انه فيها بياض بيض ...



5/ Cream Cheese Buttercream
مقاديرهـا :
200 جم جبنة فيلادلفيا
اصبع زبده لين
2 كوبين سكر بودره
فانيليا

طريقتهـا :
بالخفاق الكهربائي اخلطي الجبنه والزبده والفانيليا حتى يصير الخليط ناعم ..
اضيفي عليه السكر واخلطي حتى يتجانس ويتماسك شوي وشكليه عالكب كيك ،
- غالبا يستخدم لتزيين الرد فيلفيت كيك -





مميزاتهـا :
~ حموضة الجبن معطيتها طعم خطيييير وغريب
~ اقل دسامه من اللي قبلها ،، وبالمره سهل تصليحها

عيوبهـا :
~ صعب تشكيلها لانه مو متماسكه مره
يعني ماتقدرين تتفنين بالاشكال فيها ، ولو جلست برا الثلاجه شوي بتذوب بسرعه ويخرب طعمها

[الهنوووف]

** طريقـة رسـم اشكـال بالشكـولاتـه

في البدايه جيبي ورق الزبده وارسمي عليه بالرصاص الاشكال اللي تبغين ،، او ارقام او حروف ..
وممكن تطبعين من النت صور واشكال تجنن وشفيها على الورق
واقلبي الورقه علشان ماتصير الشكولاته من جهة الرصاص ويجيكم تسمم والا شي
ذوبي شكولاته بيضاء على حمام مائي حتى تذوب تماما ..
وارفعيها واتركيها دقايق بس علشان تبرد شوي ، وحطيها بقمع او بكيس بلاستيك ،
وقصي طرفه وارسمي فوق الاشكال اللي راسمتهم عالورق ودخليها الثلاجه تبرد ..



علشان تلونين الشكولاته ، حطي نقط من ملون الطعام مع شوية زيت
وصبي عليهم الشكولاته البيضاء السايحه واخلطيهم سوا واشتغلي عليهم ..



الحكمه من الزيت انه لو بتحطين الملون لحاله بتجمد عليك الشكولاته وماراح تقدرين تتحكمين فيها
لو جمدت عليك الشكولاته وانتي تشتغلين دخليها المايكروويف 5 ثواني وبترجع تسيل من جديد ،،




خـلـصـت ،،،
حاولت قد ما اقدر اقدم بموضوعي الجديد واللذيذ ،، وتأكدي انه مافيه طبق انزله الا وانا مجربته كذا مره
ومعدله فيه الين ما اوصل للنتيجه اللي اللي ابيها ، وحاولت اشرح بالتفصيل الخطوات حتى يكون كل شي واضح عندكم
ولو عندك اي استفسار او سؤال ، ياليت يكون هنا بالموضوع او عالخاص مو بالتقييم ،،
لانه كثييييييير اللي يسألون بالتقييم ويدوخ راسي مالقيت ملفاتهم ولا قدرت اجاوبهم
وكل من تأخرت بالرد عليه او ماقدرت اجاوبه اتمنى انه يعذرني ومايشيل بخاطره علي
كلكم على عيني وعلى راسي واتشرف باني افيدكم واخدمكم لكن الدراسه تشغلني عن النت وتروح اسابيع ما ادخل فيها هنا
فتقبلوا اعتذاري واسفي ،،


واخيــرا ..
ان اصبت فمن الله سبحانه وان اخطأت فمن نفسي وخيّـاله والشيطان << ادري انه مالها دخل بس من زمان ماحارشتها



نورتوا موضوعي بطلتكم وزيارتكم ،،
وحيااااااااااااااااااكم ربّـي ...