بقايا حزين

[عبدالله الحديبي]

كـ العاده : عذراً على الغياب ..

.

الحزن ( ضامي في خلا ) والحشا ( بير )
ميّت عطش .. شرب وغنى شباعه "

من وين ما دوّرت لي صبح وعصير
نور وفرح .. ما شاف نوني شعاعه

و اليا اظلمت ما نام للبال تفكير
ليلي ( منبّه صبح ) مزعج سماعه

اشياء من حولي تصيرني اصير
مشغول فكر ومنهمر في ضياعه

ياليت لي جنحان و افل و اطير
واسيب ضيق القاع رغم اتساعه

الضيق من ناسٍ على ظهره تسير
ماهوب من وقتي ولاهوب قاعه

ناسٍ فـ ظاهرها محبة و تقدير
لكنّ باطنها / نفاق , و بشاعه

خلف الامام بـ صف , خشية و تكبير
وقلوبهم حقد وخصام و قطاعة

ناسٍ تردّى حالها . ما بها خير
( حسن التعامل ) في زمنها بضاعه

اللي معه مالٍ و ربعه مشاهير
لاقال . لبّوا له بـ سمعٍ وطاعه

واللي فقير و راس ماله دنانير
اليا عطوا له وجه يغسل شراعه

وجدي وجود السوري اللي فـ تفجير
عجز يقوم وطفلته في ذراعه

حاول لجل بنته و عزّم على السير
وطاح , وصدح باسم العرب / يا ضياعه

ما يدري ان القدس صاحت وكشمير
و ضميرنا من ذلّته لـ ارتياعه

( ميّت فـ صدر حياء , اصغرهم امير )
مدري متى يكشف لنا عن قناعه !!

على سنينٍ شيّبتني و انا صغير
من هول ما شافت عيوني فضاعه

وين انت ي اللي ضحكتك ضحكةٍ غير
حاجة م بين الـ أه صدق و مياعه

ي اللي الخطاوي في غيابك مشاوير
والا الشهر في حضرتك ربع ساعه

تعال بـ اقطف من شفاتك نواوير
ملّيت من جو الشعر و الاذاعه

للحزن من بعدك فـ عيني تعابير
لو كنت وحدي , او م بين الجماعه

داء الحزن م تفيد فيه العقاقير
و انا بدونك ما بقى بي مناعه

#عبدالله_الحديبي

[انا السليمي]

قصيدة رائعه وابيات جميله
شكرا لك شاعرنا عبدالله وصح لسانك

[عبدالمجيد العدواني]

ي اللي الخطاوي في غيابك مشاوير
والا الشهر في حضرتك ربع ساعه

صح لسانك

[علي بن الحبين اليحمدي]

صح لسانك
اعجبني ذيه البيت :
ي اللي الخطاوي في غيابك مشاوير****
والا الشهر في حضرتك ربع ساعه
لاهنت

[احمد صعمود]

شاعر جميل يالحديبي عيني عليك بارده
وصح لسانك وزادك الله شاعريه

تقديري