طفل رومانسي ويرقم

[العرنين]

سلام عليكم
<<< وربي معجبني من بينهم
مثل اي طفل سعودي كانت طفولتي رومانسيه وهدوء الى ابعد حد
ما عمري كسرت شي ولا طقيت عيال الجيران ولا طليت من السطح على بناتهم
حياتي كلها قمه في الرومانسيه وجعلكم ما صدقتم
ثيابي تقعد بالاسابيع ما انغسلت لانها دايما وابدا نظيفه حتى ان ابوي ما صار يعرف
شكل علبة التايد ولا الكلوركس <<< اترك لكم التعليق
حتى الوالده طلبت يوم من الايام اننا نبيع الغساله ونشتري طشت صغير عن قولة
ان ما عندهم غساله
كان شعاري نام بدري تصحى بدري نشيط وتروح المدرسه وانت مفتح
واذا رجعت تقعد مع البابا والماما ساعة بعدين تروح تذاكر ساعتين
وبعدين افلام كرتون لمدة ساعه
كانت افلام الكرتون المقدمه لنا تقدم افكار حلوه للاطفال
كانت تعلمنا وش لون نقدم ورده للبنت ووش لون تطلع في عيوننا قلوب اذا شفناها
وكيف نحرك حواجبنا عشان نلفت نظرها ونتطور بالغمزه اللي تخليها تنصرع
بعدين يجي فلم يعلمنا ان الخنزير احسن حيوان
لطيف اليف ودمه خفيف ......<<< متعوب عليها
حتى انه اغلب الاحيان يطير بجناحين وانتم عارفين القصد
خلاصة الذكريات عن طفولتي الورديه
اليوم قعدت اتابع فلم كرتون في قناة اطفال لقيت ان الفكره ما تغيرت
الرسومات تغيرت وتطورت لكن الفكره نفسها
ومن التطور في الرسم اخترت لكم التالي
بنت بمايوه يسوي لها واحد عضلات مساج على الشاطي
بنات بملابس عاريه يفكرون في مشروع يصيدون فيه شباب عشان الحب
الخنزير صار اطيب من اول ..يا زينه يهبل حتى لونه صار جوناااااااااااان
الحين لا تلومون البزر اذا لقيتوه يرقم
فالرومانسية شعارنا الذي تربينا عليه
.
ما يستفاد
1-الله يستر من الردوووووووود
2-امحق رومانسيه
3-نفسي افهم وش حببهم في اقذر حيوان
.

[ذيب زهران]

والله حالتنا حاله

والله انك صادق

الصور وكل شيء تطور لكن الفكرة نفسها



متى نصحاااااااااااا


الله يستر







تقبلوا تحياتي

[العرنين]

ذيب زهران
مشكور على مرورك
ولن نصحى دام كل شي يجي جاهز
.
.
دمت بالف خير

[صالح بن فارس]

كلها كوم والنظافة كوم !!!

>>> شكلك تنام في غسالتكم علشان كذا بعتوها

وبعدين ياخي وش فيك على أفلام كرتون يا حليلها خفيفة دم بالذات عدنان ولينا وجدها اللي يفكوه من سلاسله من تحت الأرض وهو بعين وحدة بعد الحرب العالمية الثالثة في بداية الألفية >> هذي يبغى لها مليون استفهام وأنا مافيني حيل


أما القنوات الجديدة كلها حقت الأطفال فما عندك أحد سوى المجد والبقية مانقول عليها إلا >> الله يخارجنا ....

أقول على فكرة وش لون علبة الكلوركس !!!

تحياتي لك يا مبدع ؛؛

[البرفسور الحنون]

الله عليك يالعرنين
ترى لو سمعوك اصحاب التايد كان سفروك للمريخ في احد يخلى بيته من مواد التنظيف
طيب كيف لما تجي من المدرسه وسط الحر لاتقول بعد ماتعرق ترى شكل امك كانت تتوحم على صابون وهي حامل بك عشان كذا صرت نظيف الله يديم النظافه عليكم
اما عن سالفة البزارين ترى الحين صار في شركة أخي على ماظن اسمها كذا تأخذ افلام الكرتون المشهور ه والحلوه
وتعيد دبلجتها وتجل الموسيقى وتحط اناشيد وتخلي أفكارها كلها اسلاميه حتى تعلم الطفل بشكل محبب امور واخلاق الدين الاسلامي ياليت تشتريها لأطفالنا ونجعلهم يشاهدونها بدل افلام الحين اللي كلها غسيل مخ تحياتي لك

[جـــبل هــــادا]

الى متى ...!!!

[البرنسيسة]

كانت تعلمنا وش لون نقدم ورده للبنت ووش لون تطلع في عيوننا قلوب اذا شفناها
وكيف نحرك حواجبنا عشان نلفت نظرها ونتطور بالغمزه اللي تخليها تنصرع
بعدين يجي فلم يعلمنا ان الخنزير احسن حيوان
لطيف اليف ودمه خفيف ......<<< متعوب عليها
حتى انه اغلب الاحيان يطير بجناحين وانتم عارفين القصد


والله يالعرنين إنك صادق وبالذات في هذي
حركات البزارين والغمززز ههههههههه
والأدهى حيوان القذارة كلها(الخنزير)
كيف صار لطيف ويطير بعد بجناحين&
من جد يبيلهم ذبح

[ابوسعيد]

اقتباس: المشاركة الأصلية كتبت بواسطة العرنين      سلام عليكم <<< ولا طقيت عيال الجيران لانك ماتقدر على المضاربة يعنى منت كفو ولا طليت من السطح على بناتهم اصلا بيتكم بعيد ماحولكم جيران حياتي كلها قمه في الرومانسيه وجعلكم ما صدقتم لا انا مصدق واذا رجعت تقعد مع البابا والماما الله يخليهم لك خلاصة الذكريات عن طفولتي الورديه لا من ناحية وردية انا اشهد انها كانت وردية . .

[ابو شوق]

تكفى يا العرنين الاخ نضيف هههههههه الله يرحم الحال ويرحم ايام زمان ( ايام الضرم ) ههههههههه
عموما طرحك اخي مميز فيه من التحذيرات ما يجب ان نحذرها 000 نعم الشي اللي مرة علينافي ايام الطفوله ( هذا اذا كان في تلفزيون ) من اخطا ان نحذر ونوجه اطفالنا منها 0000000 تسلم اخي والله يخلي قنات المجد للاطفال 000

[ماجد الزندي]

اقتباس: المشاركة الأصلية كتبت بواسطة العرنين      ثيابي تقعد بالاسابيع ما انغسلت لانها دايما وابدا نظيفه حتى ان ابوي ما صار يعرف بنت بمايوه يسوي لها واحد عضلات مساج على الشاطي .

الله يرحم ايام زمان ايام سروال وزارة المعارف .. اما الثياب فانا مصدق انك ماعمرك غسلته لان ماعندك غيره
وبعدين المايوه ماقلت لنا وش لونه لاني احب الاحمر والثيران تكره الاحمر

مبدع وراااااائع وتستحق ان ارفع القبعة احتراماً لقلمك المميز
دمت بخير,,