الكنداسة

[الرحباني]

السلام عليكم ورحمة الله وبركاته

جبت لكم هذا الخبر اللي اتوقع قليل اللي يعرفونه وقليل جداً بعد

كنت في جده قبل أسبوع وسمعت صوت تنسيم بالكنداسة طبعاً سيارتي شبح موديل 96 المهم رحت لمحلات الشكمانات اول واحد قالي الحمها لك بـ30 ريال والثاني قالي لازم تغير هذي الكنداسه وتركب فلاتر لأن هذي حقت بلادها ترجع الحرارة على المكينه وتخفظ عزم السيارة قلت كم الفلاتر قالي بـ100 ريال قلته وريني إياها (الفلاتر) يوم شفتها شكيت بالموضوع لأن من شكلها (الفلاتر) انها تكلف اكثر من الـ100ريال رحت لمحل ثالث قالي غير وركب فلاتر قلت كم قالي بـ220 ريال بعدها تأكدت ان الموضوع ماهو طبيعي رحت لواحد رابع وبدأت تنكشف اللعبه قالي غير وركب فلاتر قلت له مو مشكله اغير بس لاتقولي أكثر من 50 ريال قالي ترا اللي عندك تحتاج فلترين قلت له خلاص لاتقول أكثر من سبعين قالي خلاص 70 ريال دخل السياره قلت له شوف يابن الحلال اخر كلام كم قال انت قول قلت خمسين قال دخل السياره عاد هنا تأكدت ان الموضوع ماهو طبيعي أبداً ..
قلت يامعلم ترا القديم ابي اخذه قال لا القديم من حقي عرفت الحين السر انه في القديم قلت طيب لو أخذ القديم كم تغير قال بـ400 ريال قلت له طيب اعطيك القديم كم اخر كلام قالي راس براس من هنا عرفت الشغله زين قلت له مع السلامه ..

الآن تجيكم الزبده انا داري اني طولت عليكم بس زي ماصبرت انا على هذولي العمال انتم اصبروا علي .

رحت للمحل الخامس والأخير قلت له ابي اركب فلاتر بدل الكنداسه قالي بـ100ريال قلت له شوف يابن الحلال فيه واحد قالي اغيرها لك راس براس انت وش تقول قال روحله قلت له مع السلامه قال اصبر شوي خلاص زي ماقالك ذاك قلت لا تزيدني قال كم قلت 100ريال قالي كثير قلت كيفك ابي امشي قال خلاص دخل السياره والله ياشباب انه اشتغل بالسياره من بعد صلاة العصر الى بعد العشاء يمكن بحوالي ساعه حتى الصلاه ماصلى وانا صليت جمع وقصر عنده داخل المحل لأني ماني من أهل جده والصراحه اني خفت اخلي السياره عنده وهو ماراح يصلى
بعد ماخلص وطلعت السياره قلت له هات ال100 قالي خذ طبعاً من غير نفس عطاني ال100 وقالي اول مره يمر علي واحد مثلك دايم الزباين خاصة اصحاب الفرد سياراتهم فيها اربع كنداسات ماهو اثنين مثل سيارتك يغيرون عندي ويدفعون لي فلوس ويمشون وانت تغير وتاخذ فلوس ..بعد كذا دريت ان الكنداسات حقت السيارات الأمريكية يستخدمون الماده اللي من داخل الكنداسة في تصنيع اصياخ اللحام ويبيعون هذي الماده الكنداسه الوحده بـ250 ريال عاد لااحد فيكم ذحين يقول انت قلت سيارات امريكيه وانت معك مرسدس الماني ابي اقوله سيارتي صح الماني بس استخدام امريكي

على العموم انا طولت عليكم بس حبيت انقل لكم الصوره واضحه للاستفاده

ويعلم الله اني ماكتبت هذا الموضوع الا من باب قول المصطفى عليه الصلاة والسلام (لايؤمن أحدكم حتى يحب لأخيه مايحب لنفسه)



وللجميع تحياتي وتقديري

[الصغير1]

مشكور ياغالي ماقصرت

[الشــــــــوق]

[ابراهيم السعدي]

مشكور
الله يعطيك العافيه

[جبل منور]

[align=center]

كلامك صحيح وواقعي يا الرحباني 200×100

والله مثل ماحصل معاك حصل معاي لكن السياره فورد


يعطيك العافيه[/align]

[ابو عادل العدواني]

الله يعطيك العافيه

[الفقار]

ماذا لو تعلمنا أن نقوم ببعض أعمالنا دون حاجة للآخرين ؟؟
شكري وتقديري لك أخي الرحباني

[Z@HR@N]

الله يعطيك العافيه
وجزاك الله خير على النصيحة

[سعيد بن سالم]

اخوي الرحباني

بيض الله وجهك على التنبية و طرح هذا الموضوع

بصراحه المفروض الواحد اذا نوى يغير قطعة من سيارته ياخذ القطعة القديمة ويرميها في الشارع افضل من ان يعطيها النصابين ذولا . حسبنا الله عليهم يستغلون الزبون في كل شيء .


شكري وتقديري

مع التحيه

[أديب]

بارك الله فيك أيها " الرحباني " ... وجزاك كل خير

قال صلى الله عليه وسلّم : " المؤمن كيّسٌ فطن "

وعلينا الحذر من مثل هؤلاء النصابين والاستغلاليين ... عليهم من الله ما يستحقون !!!


تحياتي ’’’’