السلام عليكم هذي القصيدة وجهتها للشاعر هليل الرشود المنعي المعني وقام بالرد عليها
في البداية هذي قصيدتي
بديت القاف بالله المستعاني--
وانا اصوغ الشعر جزل المعاني--
على طاروق (مالك) جيت سابك--
ذهب معيار ستّعش وثماني (24)--
وشي ن بالكلام ازريت أقوله--
فضيته بالشعر يومه لفاني--
وابدخل في المواضيع ابصراحة--
عجايب ذالزمن شوفة عياني--
فأنا شفت الصحيب أدعى صحيبه--
عطا علباه في جور الزماني-
وأنا شفت الوفي مثل السواني--
وشفته بالحدق شوف الظماني
يبيعون الوفا نسل الرخامه--
ويشرونه طويلين اليماني--
وانا شفت الظلوم وميسم ن له--
كوى اللي ما نطق ذا من كواني--
على الله يشكي المظلوم حاله--
عسى العسر ايتقفاه اللياني-
وانا شفت الحسد واهل النميمة -
وسخ بقلوبهم طال اللساني—
سعوا بين الحبايب بالمفارق
نسوا ما واعد الله من هواني
وشفت الذيب يبلش بالبهيمه--
يجوع الذيب واتْشبْع الحصاني--
وأشوف المبتغى سبعين قامه--
وأشوف المبتدى صعب ن عصاني--
قصير اليد نظراتي بعيده--
وحلمي ما تحققه الاماني--
ينوح الراعبي وآنوح والعي--
وأدوي كالعشيق المولعاني--
ومن ضيق ن على ضيق ن أهاجر--
يضوق الكون من ضيق المحاني--
وسبع ن تنطبق من فوق سبع ن --
مثل ما يطبق الميت الدفاني--
ألا يا من تسلسل من أشاوس--
أشاوس روحت بالمرزباني(المرزبان قائد جيش الفرس في معركة سلوت)--
سلالة من حكم بعمان كله--
ولا قبله من العربان ثاني--
هزمنا الفرس في (سلوت) واضحوا--
طريحين الثرى بين الدخاني--
طغينا لا زمن طالب وغالب--
ويدعم حلف الهناوي بياني--
سلام الله على (فهم) العريقة -(فهم هم دوس بني فهم ،، و المقصود سلالة مالك بن فهم الدوسي في السلطنة)
سلام بدهن عود وقيحواني—
سلامي عد ما هل الغمام-
سلام بزيزفون وديدحاني-
وألا يا غانم ن بالطيب كله --
والا يا مخضب ن حد السناني--
ابا ردك على من ضاق صدره --
عسى تشفيه من جرح الزماني
وهذا الرد من الشاعر هليل الرشود المنعي المعني
بديت بمنزل السبع المثانى-
الله عالمن ما بالكيانى-
أصلى له وأركع له وأسجد-
عسا يغفر ذنوبى ويهدانى-
الهى طالب التوفيق منك-
أبيك تشد عضدى بالامتحانى-
لانى دون توفيقك اضيع-
واحس انى ضعيف بالزمانى-
هلا يامرحبا مليون واهلا-
عدد ما هل سكاب الامزانى-
وعدد ماسجل الحرف بكتاب-
وعدد ما ينطق الهرج اللسانى-
وعدد من طاف بالبيت الحرام-
عدد حب الرمال وما كفانى-
هلا بك يا ابن عمى يالعزيز-
من الدمام لبلادك عمانى--
اهلي بك وارحب بك واردد-
مكانك بالعيون وبالمحانى-
سنافين تسلسل من سنافى-
وفى شهم طيب مرحبانى-
يابوسالم شكيت اشياء صعبه-
وا نا قبلك شكيت اللي وزانى-
تبدل حالنا مليون حال-
من العالى تنازلنا لدانى-
زمنا صالحن ما فيه عيب--
لكن العيب دايم بالانسانى--
فضيعنا بدايتها الصلاة-
وعشنا بالمعازف والاغانى-
واخذنا هاتف ونت ومسلسل-
وتهنا وأبتلشنا بالغوانى-
طغت بعقولنا حب المظاهر-
وقلدنا الامريكى والالمانى-
وانا ما حيت اعم بذا القصيد-
فأات اخصها قاصد وعانى-
فأات الله يهديهم جميع-
على درب التقا ويا الايمانى-
نسوا رب العباد اللى خلقهم-
طغوا فالارض لو العمر فانى-
نسوا عهد مضا في وقت اهلهم-
وتاهوا بالطريق الغيهبانى-
تشوف احوالهم تشفق عليهم-
اسف والله عليكم يااخوانى-
حقوق الجار ضاعت والامانة-
وحق الوالدين اليوم هانى-
وباب الوصل مغلق والتواصل-
تطوف ايام جارك ما يبانى-
لكن وقت المصالح والفوايد-
تجيك وجيه يالله المستعانى-
وبعضهم لا هرج هرجه حلاوة-
ومن خلفك شرات الثعلبانى-
وبعضهم داخل المجلس شجاع-
لكن وقت اللقا يمسى جبانى-
تشوف اهل المناصب والمكانه-
معاد ألهم على الكلمه مكانى-
ومن لا كان له أول مكان--
تسيد واستوى ذيب و احصانى-
وشوف الواسطه تفعل فعلها-
وامسا الحق ضايع يا فلانى-
سكب سحب الحسد هو والوشايه-
وامسا الصدق ماله من موانى-
وقلت بالزمن هذا الصداقه-
تشوف اخوان ما كنهم اخوانى-
بلاوى بالزمن هذا بلاوى-
لكن نقول يالله المستعانى-
ولو نحصى الزمن هذا وفعله-
تشوف من البلاوى شي ثانى-
ومنك المعذرة وابغى السموحه-
اذا قصرت معكم بالبيانى،،،،