في تصوري الوان الثياب التي يرتديها الشباب حاليا
جميعها الوان متداوله في السوق ويلبسها الشاب والشايب
سواء ابيض او اصفر اوغيره سواء الصيفي منها او الشتوي
وتباع وتشرى من محلات الاقمشه الرجاليه وليس النسائيه وما اشوف فيها غريب
والاسعار قديما وحديثا فيه الرخيص وفيه الغالي انت ودراهمك
فيه بخمسين وفيه بميه واكثر وفيه بألف واكثر
وسعر الثوب لا علاقة له بالموضه كل مافي الامر الدراهم
بمعنى اللي معه كاش بيفصل غالي واللي على قد حاله بيفصل رخيص
ويمكن بعد يلبس الدفه وغيره من الجاهز
مسألة التطريز سواء ياقة الثوب او كبك الاكمام ما اشوف فيها شي
لان غالبية التطريز بالوان مقبوله وقريبه من لون الثوب
انا ما اذكر اني شفت احد لابس ثوب ابيض او اصفر ومطرزه بلون احمر او فوشي
او برتقالي او اي لون صارخ عشان نسميه فستان
بعدين ما اشوف ان ثياب الرجال تضاهي فساتين الحريم في الشك والتطريز
لاني ما اذكر اني شفت ثوب رجال بكسرات والا باكسسوار مثلا او كم فيه وكم بدون
وما اذكر اني شفت ثوب رجالي منشق من الجنب او عليه ثلاثه اقمشه بالوان مختلفه
اشكرك استاذي فهد على الطرح وان اختلفت معك في جوانب كثيره منه
ولكني اوافقك الرأي بأن تفصيل ثياب الشباب في الوقت الراهن اختلفت عند البعض
عما كان في السابق ولكن لايعني انها مخالفه للذوق العام كل مافي الامر تطريز خفيف
يضيفه البعض من الشباب وحتى كبار السن لهم منها نصيب
في الختام كان ثوب ولا يزال ثوب وسيبقى ثوب
والله لا يجي باليوم اللي نسميه فيه فستان رجالي
وجهة نظر شخصيه
يعطيك الف عافيه