[ندوش]

قصيده لابو علاج

الصـدر ضاق وغيّر العدل بالميل
عــــزّ الله انّـــه دوب زاد اشتياقه

وأصبح لصلفات الروابـع مداهيل
معها على غوص الخوافي بطاقه

ولا ينفقد غــير الرجال الحلاحيل
وألا الردي عــيدٍ يقـــــرّب فراقه

ولولا التجـارب ما طلعنا رياجيل
ولولا الشــــــدايد ماجتمعنا رفاقه

يابوفهد كم لي عن الجدي وسهيل
بانت حقـــايق مدّعــــين الصداقه

اللي لحاجتــهم نجيـــــــهم مقابيل
ولحاجــتي كــــلٍّ عمــــد للدراقه

تكاثـــروا فيــنا أصدقانا المراسيل
ومــن غـاب عنّاله من الورد باقه

وشكــراً مابي فيــها مقابل وتبديل
يكفي ان لهافي مغلق الصدر فاقه

وعفـواً إذا فيها من العكس تحليل
حروفــها جـــــلاله ما فيـها دقاقه

واقبل تحياتي عـــــدد سايل السيل
من هاجساهيضه من الشوق ساقه




وهذه ايضاً قصيدة اخرى للشــاعر




ينزح من الدهـــــم الســــرايع روايع
و يفهــــق عن جمـــال الحمايل بعيّر

و ينـــوز من عـوج الكـراسي طلايع
ويظـــهر على جـذوع المطاعيم ثيّر

و يارث سلاطــــين النوامـــيس مايع
وينصـــب على الشــدة كديــش منيّر

وكــثّر من أمداحــــــه جليس الربايع
ولا اطــــــراه قال انّـه تقــــوله نويّر

عيـــبه من لســـــانه يعــــدّه شوايع
ما يدري إن اسمــــه ما طب المسيّر

لا ادخل دخـــيل ولا قطع جوع جايع
أمـا حثــــــــالة قـــــــــوم وألا مطيّر

ما شــــاع صـــيته بالســنين الجلايع
ألا سنــــــة حــطّ الرحل عن خضيّر

وعَمّ الرخـــا وأطغى شريطي وبايع
وقفّــــا زمـان البطش واعفى المظيّر

وكثــرت مع جـــور الزمــان البدايع
وزلّ المــــــزا حتى لبـــــاس الخديّر

فمن عاش بالدنــــيا يشـوف الفضايع
فضــــــــايعٍ يلومهــــــــــا كـــل خيّر

منها الزمــــن عــذر اختلاف الطبايع
لا اطـــــــرى بعضهم قال وقت تغيّر

والخُــلف في ناس تضـــــيع الصنايع
وألا الزمن ماخلف رجب عن قصيّر

ولا قــــال لحثـــــالة تبـــــيع الودايع
وتجزى راع المعروف بحكىالمعيّر

وتغـــــش وامنـــها بأشــــــّر البضايع
وتعطيه في حجــم الكبــــير الصغيّر

وترخــص مذاهبها من اجل الطمايع
ورصيـــــــدها على شــــــرفها مقيّر

فمالٍ بــلا شـــيمة ومعـروف ضايع
يذهــــب وراهــــــم بالمدر والحجيّر