[ابن روزه]

الفيـــــة الخزمري

الشاعر/ علي الخزمري

(الف)ابدا قصـيدي بسم ربي لعـلّي=ارقى جنـان الخلد ،والخلد مرغـوب

(باء)بالله يا هاجوسي اقصد وقــلّي=عذب الكـلام، وجيد القول مطلـوب

(التاء)تعال و اوصف لي حبيبي وخلّي=وصف يخلينـي مـن الحب مااتـوب

(الثاء)ثم احكم المعنى وصف ماحصلّي=من وقت ما شفتـه وانا فيه مسلـوب

(الجيم)جمال مثله ، لا بعد ما وصـلّي=من زود حسنـه صار للقلب محبـوب

(الحاء)حلو المحيا ، نظرة به تسلّــي=قلب من همـوم المشاويـر متعـوب

(الخاء)خوي قلبي ، نور عيني وكلّـي=ولزيـن روحه كل ذا الزين منسـوب

(الدال)دايم على بالي ولو جا وطلّـي=طلـّة غزال اهيف الجيد رعـبـوب

(الذال)ذاب لغرامه كل قلب ، ومن لي=غيره يـداوينـي من جروح وتعـوب

(الراء)رفيق عمر ومنه ما اظن املّي=من نظـرة بعيونـه القلب مصيـوب

(الزاء)زيّه ابد ما شفت، لا ما حصلّـي=هو عـالي الهمه وهو راس مرقـوب

(السين)سيد ملوك الزين ولا جا يهلـّي=هلّـة مزون فوق صحرا ومجـدوب

(الشين)شبيه ظبي وله عيـون تخـلّي=من زينـها قلبي مـولع ومـلـعوب

(الصاد)صافي الملامح واضح مسفهلـّي=نوره سـواة الشمس، طيّب وحبـّوب

(الضاد)ضاري وانا من حلوريقه احلـّي=شفـايفي والحلو بالـريق مصبـوب

(الطاء)طويل قـامه والشعر يوم فـلّي=كنه مع نسمـات الارياح مسحـوب

(الظاء)ظليل عين ومن رموش تظـلّي=من تحت حاجب كنه السيف محروب

(العين)عسى العيـون اللي حسوده يولّي=منها النظر ويصير في شوفها عطوب

(الغين)غالي حبيبي وان رخصتوه اغلّي=حبه لبســني لبسـة الجسم للـثوب

(الفاء)فيه الكلام فـنون، ويالله هب لي=من حالى الاشعـار حـفظ ومكتـوب

(القاف)قديم عشق وعـنه ماني مولـّي=بابقى مـعه لو مالت الشمس لغروب

(الكاف)كمّلـه ربي وبـالمكارم معلـّي=شانه وقدره فوق ع الـراس منصوب

(اللام)لا جاه ضيق احس بالقلب شلّـي=يوصـله من قلبي مراسيـل وندوب

(الميم)ما اقسى عليه ولا نويت التخلّي=عن حبه ، وحبـه مع الزاد مشـروب

(النون)نسيت كل الناس لامـن وصلّي=وش لون ما انساهم وانا فيه مطروب

(الهاء)هو وحده اللي خذ خفوقي وكلّي=باني له بـقلبي عـواميد وطنـوب

(الواو)والله لاابقـى لـه وفيّ وخلـّي=واحمـيه لو من دونه الدم مسكـوب

(الياء)ينام وسـط العين والعين ظلـّي=تـحميه وتظللـه من برد ولـهـوب