[الراس الصغير]

ها اسمعوا هذي السالفه.....


اعلمكم بموقف صار لي ايام المرحلة المتوسوطه يعني يوم كنت ادرس انا وآثنين من الزملاء ..كنا في اول متوسط

وتعرفون انتلقنا من مدرسة ابتدائيه الى قريه بعيدة عنا حيث هناك متوسوطه وثانويه ..

المهم السالفه وما فيها...

اننا الثلاثة وانا طبعاً كنا نفطر يوميا ..مافيها كلام ...

وكان كل واحد منا يقط بريال فقط لا غير ...ايه يا ايام الفقر ..

وايش كنا نفطر بالثلاثة الريالات ؟:

تخيلوا ثلاثة رجال ما معهم الا ثلاثة ريال يفطرون بها ..واليوم كل واحد يفطر بثلاثة ريال

زمن عجب..المهم وين وصلت انا في السالفه ....ايوه


كان كل يوم على واحد يروح ويشتري تميس بريال والريالين الباقيه يشتري حلاوى طحينيه ... ياعيني على الطحينيه ام خروف اذا كنتم تذكرونها ... تنكه عليها صورة نعجه او خروف سمين ...

يسمونها في الشرقيه ( رهش ) مدري عنهم ليش يسمونها رهش ...

المهم وكان اللي عليه الفطور يجيب معه ثلاجة شاهي من البيت ...
تمام ..

وكنا على هذا المنوال وعلى هذي الطريقه يوميا واذا بغينا نغير من الطحينيه نشتري تونه بريالين وندرعم عليها..

وفي يوم من الايام جاء الدور عليّ انا رحت اشتري كالعادة تميس وطحينيه واشوف المصري يغرف لواحد من الشباب من تنكة جنب تنكة الطحينيه ..يغرف لواحد من الطلاب شياً شكلة مثل الأيدام يعني ماعرفته انا قلت يمكن أيدام ياولد..:sm290:

قلت ليش ما اخذ للشباب من هذا الايدام احسن من الطحينيه .. ونجرب الايدام

وفعلا قررت وقلت للمصري هبلي من التنكه تامعك ..قال المصري آيه عاوز طططططط وما فهمت ايش قال ...لكن قلت : هبلنا يا شيخ من هذي التنكه وخلني اروح ..قال عاوز بكام ..
؟
قلت بريالين وزد توصه قال حاضرين ..والله ما قصر المصري املاء الكيس البلاستك أيدام وزاد كثّر.كثرّ الله خيره ..

وانطلق الى الشباب .....

يستنون الفطور في مكان دايم نفطر حوله ..

وافرش السفره وافك الكيس وقلت اليوم لا طحونيه ولا طحينيه

اليوم آيدام .. أيدام .

قالوا وبغوا يتشادقون الله ايدام ..

والله ايدام مننيه اشتريت هذا الايدام وبكم ؟

قلت بريالين من عند راعي الطحينيه .........
المهم ونذوق الأيدام ....وع وع وع وع وع

وش ذيه يا ولد ..

طلع طرشي ..هههههه

حسبي الله عليه ليتني ذقته عند راعي الطحونيه وكان ما تفشلت من ربعي ..لكن ثواره

تعرفون الطرشي او المخلل ( خظروات مقطعه حتت وعليها خل )..
وانا احسبتوه ايدام ...

عاد شوف الضحك واللي يقول هذا ما استوى واللي يقول هذا الايدام شكله من امس واللي يقول وش اغداك على هذا الايدام لو خليتانا على الطحينيه احسن لنا .. واللي يقول هذا غشك ..

والطرشي ماهلا زقينابه وزدنا ابتلينا التميس في الشاهي يعني كلنا التميس قافراً مع الشاهي ..

وهذي القصه صارت صدقاً ماهب كذاباً.... ويشهد الله ..