من غير تقديم ..
اولى وثاني وثالث .. ادمجوهم سوى .. اولاد مع بنات .. سيم سيم .. مافي فرق .. الولد يطلع من حظن اومه .. لحضن ابلته !!
والبنت ماتفرق معها .. لانها من حضن لحضن .. كله انثوي.. من اولى ابتدائي الين الثانوي !!
اما الولد بيدرس الين ثالث في وسط انثوي ..يعني الين يصير عمره عشر سنوات .. وعقبها بيتولجونه الاشناب !!
في البدايه .. اشوف ان مسالة الدمج من الاساس مالها سنع .. بما ان المبرر لهم .. استمرار الجو الحناني للطفل في البيت والمدرسه لمدة ثلاث سنوات .. وابعاد الخوف الذي يعانيه الطفل بسبب خروجه من جو البيت لجو االمدرسه !!
مارح اتكلم عن البنات بحكم ان جوهم لن يختلف كثيرا .. كما هو الحال للاولاد !!
بتكلم عن الاولاد اللي هم الهدف الرئيسي من هالقرار !!
لما يطلع الولد من جو البيت واللي غالبا مايكون هادئ ومتنوع الاجواء انثويه وذكريه .. يروح لجو المدرسه اللي كله انوثه !!
وش راح يتعلم من خبرات .. ولااتكلم عن المناهج .. فالمناهج تقريبا شبه موحده للجنسين .. لكن ماهي الخبرات التي سيتعلمها الطفل الولد .. من هكذا جو مدرسي انوثي !!
غير كذا .. لابد ان نعرف .. الفرق بين هالجيل والاجيال اللي مضت !!
جيل البلاك بيري .. وجيل .. الخيزرانه !!
تغيرت الاجيال .. وتغيرت الاخلاق .. وتغيرت معها القناعات !!
جيل مايعرف شنو يعني بنت .. وجيل مايمديه يوصل خمس سنوات .. الا وعنده صديقه !!
الحين .. وش تبون .. خلطتوهم سوى .. عرفتوهم لبعض .. كسرتوا مابقي من حواجز !!
قبل .. يمكن الين الثانوي .. والولد يستحي يناظر بنت .. الحين .. من عمره .. خمس .. تلقاه عارف الكفت كله !!
ياحلوه انتي .. ياقوومر انتي .. يالبااا !!
كلمات .. ليست كالكلمات !!
وش تبون بعد .. مو كفايه .. طيحني .. وسامحني !!
تبون بكره .. ميك اب .. ومناكير .. وبديكير .. ومو بعيده .. روج زوهري !!
بجيك واحد .. يقول > هذي الاشياء موجوده بالبيت .. مع اخواته .. وامه .. وقريباته ...
زين اوكيه .. بالبيت .. فيه من يعلمه .. ويفهمه .. لكن بالمدرسه .. ست ساعات .. مسنتر بين هالحريم .. من يفهمه .. ومن يعلمه .. الحين المعلمه .. ياللله .. يالله .. تقوم تهتم بكشختها .. ومو فاضيه تربي عيال الناس !!
غير كذا بعد .. افرض .. فرضا يعني .. هالولد .. يعيد السنه .. ويطق بدل الثلاث سنوات سته .. يعني بيصير عمره 12 سنه .. وهو مرتز بينهن .. مو الحديث يقول فيما معناه : (اضربوهم لعشر وفرقوا بينهم في المضاجع )
حتى البنت من المعروف انها تبلغ في تسع .. وعلى هذا .. فهي تصل للصف الثالث وقد بلغت .. ماذا لو عادت سنه او سنتين !!
صراحه .. قرار مدري شنو مردوده .. وشنو يخططون عليه !!
سنين وسنين .. وحنا مرتاحين .. والحين جبتوا لنا قلق !!
مخلين القرارات الاهم .. وناشبين لها القرار .. وينكم من معلمات النائيات .. والقرى والهجر .. وينكم من الباصات والسواقين السوابق !!
خلو الولد في حاله .. والبنت في حالها .. وشوفوا لكم حل في الحوادث !!
شنو رايكم انتم ؟؟
مع التحيه