التقاعد
الله يجيبك يالتقاعد ونرتاح **** ياالله عسى في الأمر خير وخيره
النفس طابت يا عسى الهم ينزاح**** من قلبي المقهور ناره سعيره
مليت أنا الروتين جيه ومرواح **** وحبوب ضغطي في الخابي ذخيره
نأخذ حقوق الخدمه منهم والأرباح**** نبني لنا فله حلوه وكبيره
ربي بلاني بريس شبه سفاح **** عنتر زمانه بس ما من بصيره
لا من زعل تقول ذا كلب نباح **** له زوجه بلشه ودائم تديره
لو تطلبه بقريد تسمع له أصاح **** كنه قطار لا مشى مع صفيره
ما مر لي مسؤول مثله ولا راح **** نطلب من الله يتبدل بغيره
لاني بشكاي ولاني بصياح **** يا كود أفضفض من هموم كثيره
زرت الأطباء وزرت عشرين جراح **** وكل دكتور اجي وستشيره
قالوا علاجك بالتقاعد وترتاح **** مع أم عيالك العجيز منيره
مع صبح تمد يدها بتفاح **** وبالوجيه الدسمه تراها خبيره
تصحى تقهويني مع الديك لا صاح **** ماهي بنات اليوم تسمع شخره
وقت الضحى أجلس مع سعود وبطاح **** ربع نشامى وكلنا أهل ديره
دايم سوالفهم بها ضحك ومزاح **** ما يعرفون أبدآ سوالف حقيره
قالوا تزوج واترك الهم ياصاح **** في القاهره تلقى هنادي وسميره
لكن أنا حر ونادى بملواح **** لا لوحت به أم عيالي الأميره
اجي لها بليا شعور ومرتاح **** مغرم هواها لو روحي أسيره
سايح بحبه مثل زبد اليا ساح **** منسى ماضيها في الليالي العسيره
كنا حياة كلها كفاح بكفاح **** تستاهل الحب هي تراها جديره
مالي حبيب غيرها اليوم يا بداح **** والعين عن شوفه سواها ضريره
الحظ معها لا تقولون لي طاح **** هاذي عمود البيت بنت الجزيره
يا الله تجيب السعد كله والأفراح **** نطلب رضا الرحمن ومعه الستيره
|