[سالم الدوسي]

قالت الشيخي ماغيره قلت ياحي النبا
ايه انا الشيخي ماغيره آمري وتدللي

قالت اسمع وش بقللك قلت حاظر مرحبا
قالت انا اهواك وادور عليك من اولي

عاشقه بس مادري ان العشق نوع من الغبا
والاهمزة وصل بين المبتلى والمبتلي

وما ادري ليش امي وانا فأول بواكير الصبا
كل ماسولفت عنك تقول:يابنت اخجلي

مادرت كانت ترضعني هواك مع اللبا
وتاب قلبي عن هواها مير عنك ما سلي

كنت احدث بك زميلات(ن)مثل خنس الضبا
ويقولوا لي ماحد قدك يابنت تنازلي

بايعتك ومشتريتك لاحلال ولاربا
غاسلة يدي وقلبي منك فارغ ممتلي

............................

لاح برق وراح شرق وذعذعت ريح الصبا
وغازلتني شمس برقعها السحاب الهملي

وسقى وجهي سحاب الدمع واهتز وربا
سرمدة ظلما وعيت شمس حظي تنجلي

وسرى داخل عروقي مثل فعل الكهربا
وانعكاسات الصدى والصوت في الفج الخلي

قلت ياقلبي وصل سعدك لحدك وش تبا
لو يضمك قلب ويصافحك كف(ن)مخملي

انبسط ياعم والاحزان تخسى وتهبا
وجهز احساسك بشان الانتقال المرحلي

وفجأه الخط انقطع والسالفة راحت هبا
الله اكبر ليش يحذف رقمها موبايلي

اكتشفت انك يابنت الناس داخلك الغبا
كان صعبه تذكرين اسمك قبل لاتقفلي؟