يـــــــو مــــــيـــات صــــــائـــــــم!!!!!

[نسيم السروات]

[align=center]






أحنا الأن في ضيافة الصغير1









وبعدما تناولنا الشاي والقهوة في ضيافة مشرففنا العزيز الصغير1

نقول له كثر الله خيرك وأنعم عليك وألف شكر على العزيمة

على هذا الموضوع الجميل .


نبدأ حديثاً عن ليالي رمضان الجميلة :

يبدأ الأستعداد لشهر رمضان المبارك قبله بحوالي أسبوع وذلك

بالتسوق لمقاضي رمضان الغنية عن التعريف والكل يعرفها :




وقبل رمضان بليلة أو ليلتني تبدأ المباركات بالشهر الفضيل بالإتصال بالأهل والأقارب والأصدقاء

عبر الهاتف ورسائل الجوال حتى أن تلك الليلة تتعطل فيها شبكات الأتصلات .










أول يوم من رمضان ؛ ( إجتماع العائله )


هذه العادة متبعينها في عائلتنا سنويا وهي الفطور في بيت الأهل جميعنا .

أحنا الأخوات والأخوان وزوجاتهم ونتفق من الليل بالأتصال فيما بيننا وكل واحدة تجيب معها

صنف أو صنفين من الأطباق الرمضانية بحيث كل واحدة تجيب صنف مختلف عن الأخريات

حتى لا تكون الأطباق متشابهة وأيضا تجيب معها ترمسين شاهي وقهوة أو أي مشروب ثاني .

ثم يكون الحضور من بعد العصر لمكان الأجتماع في بيت الأهل حتى نتعاون في تحصير سفرتي

الرجال والنساء :




طبعا نسوي فترتين للفطور عشان وقت الصلاة بحيث تكون الفترة الأولى عبارة عن

التمر والقهوة وحلاويات القهوة مثل الكنافة والبسبوسة وتشيز كيك والقطائف . .


وبعد المغرب السفرة الثانية والتي يكون بها جميع الأصناف من صواني ومعجنات ومحشيات

وفطائر وسمبوسات بحشوات مختلفة على حسب الأذواق . وسلطات مشكلة وشربة وعصائر وعلى رأسها

طبعاً الفيمتو ( طعم اللقاء ) وغيره.

بعد هذه السفرة موعد جلسة العائلة مع مشاهدة التلفزيون وشرب المشروبات الساخنه مثل :

الشاهي والقهوة والنعناع والشاهي الأخضر والزنجبيل وغيرها .

يأذن العشاء وبعد الصلا الرجوع مرة ثانية ونضع بعض الأشياء من بواقي

الفطور ثم كل واحد يأخذ عائلته ويذهب إلى بيته بعد الأتفاق بأن نهاية كل أسبوع

الفطور عند واحد يعني الأربعاء والخميس والجمعة كلها عزائم كل واحد عليه الفطور مرة .

يومياتي في رمضان :

بعد ما أصلي الفجر أقرآ حزبي من القرآن الكريم وأنام حتى أذان الظهر وأذهب إلى المطبخ

وأخرج الأطعمة المفرزلة من الفريزر عشان تذوب كاللحوم وخلافه ، وأعجن عجينة اللقيمات

والفطائر وألف السمبوسة .





وإذا بقي وقت قرأت شي من القرآن حتى يأذن العصر وبعد صلاة العصر تبدأ المعركة الحاسمة

في المطبخ والمحاربة بين الصحون والقدور والملاعق حتى يحين وقت أذان المغرب ونجهز السفرة




ثم نفطر بنفس الطريقة التي ذكرتها سابقاَ وبعد الفطور يجي وقت الراحة والأسترخاء بعد عنا المطبخ

وجلسة عائلية أمام التليفزيو وأحب أشوف برنامج خواطر أما طاش وبيني وبينك مصخوها في الأخير

خاصة بيني وبينك فشلونا من الأتراك قال أيش ( نور ولميس) ماكنهم قد شافوا خير هههههههههه

وكذلك أحب مشاهدة عوانس ستي وباب الحارة .

وبعدها أخذ لي ساعة أو ساعة ونص نوم ثم أقوم بتجهز السحور ويكون عبارة عن أشياء خفيفة

كالفواكه واللبن والزبادي أو قشطة وتمر ..

وكذا برنامجي يوكون :


أما أصعب المواقف التي مرت علي فهي :

وفاة والدي رحمة الله رحمة واسة وأسكنه فسسيح جناته

وذلك يوم الأربعاء 9/9/1418هـ فهذا يوم لا يمكن أنساه وكل رمضان يتجدد ذكراه.



أما المواقف الطريفة فهي كثيرة وقد ذككرتها في موضوعي ذكريات رمضانية جميلة

وهنا سوف أذكر لكم منه واحد فقط .

في أول رمضاني صمته مع زوجي بعد الزواج كنت متوحمة والكل عارف مشاكل الوحم .

جيت على المطبخ وأنا متقرفه ومتلثمه ما أبي أشم رائحة البصل وأحياناً البس كمامه على

خشمي كأني طبيبه داخلة غرفة عمليا أو ولاده ههههههههههههه

وأخذت طماطم من الثلاجة وشكلها حلو وبارده وجلست أقطع فيها وصرت أقطع شقفه وأكل شقفه متوحمة على الطماطم

وناسية الصيام وما تذكرت إلا من برودة الطماطم في بطني . وحسيت بالفشيلة من نفسي . لكن الله سبحانه وتعالى هو اللي أطعمني .


هذا وأسفة على الإطالة الزائدة

وأشكر مرة ثانية أخي الصغير1

وكل رمضان والجميع بصحة وعافية .[/align]

[بنت السروات]

مساء الخير.. معطر بالفل والجوري
لكل أعضاء هذا المنتدى الغالي ..

في البداية أشكر الأستاذ الصغير 1 على استضافته لي
وأعتذر عن التاخير ..

رمضان مبارك علينا وعليكم
وأعاننا الله وإياكم على صيامه وقيامه وجعلنا فيه من المقبولين


بالنسبه لرمضان يتميز بطابع خاص لما فيه من عادات وعبادات مختلفه عن باقي الشهور

بداية صيامي وانا بالصف الرابع وكنت ما أصدق يأذن المغرب عشان
أشرب عصير أو مويه بعد يوم طويل مره بالنسبه لي ..

أما عن يومي االرمضاني
أصحى من النوم بعد الظهر أصلي وأقرا قرآن .. وبعدها الإتجاه سيده على المطبخ ابدأ فيه بالمعجنات والحلى
وبعد صلاة العصر أكمل ما بدأت في المطبخ من طبيخ وغيره
قبل المغرب أجهز سفرة الفطور من كل ما لذ وطاب ،ووقت الفطور أتابع برنامج خواطر ولا يمكن أفوته
أصلي المغرب ونرجع نكمل فطورنا
بعدين يجي دور الشاي المنعنش مع شوية مكسرات واحنا نتابع التلفزيون بين المغرب والعشا
أصلي العشاء والتراويح ونشوف باب الحاره وبعد كذا نزور أحد من الأقارب أو نطلع سوق
وإذا ما رحنا نتسلى على النت وأسهر مع العائله الكريمه
وبعد نصف الليل يبدأ طبخ السحور .. ما في فكه من هالطبخ
يجي الفجر أصلي واقرأ و انام
وهكذا يبدأ يوم جديد وعلى نفس الموال

بالنسبه للمسلسلات اللي أشوفها ..
طاش/ بيني وبينك /باب الحاره وهو الأهم طبعا

هذا تقريبا كل اللي عندي وما أحب أطول عليكم
عشان ما تتملوا وانتو تقرون


أخيرا
جعلنا الله وإيكم في هذا الشهرالكريم من عتقائه من النار

[الصغير1]

صبحكم الله بالخير جميعا..

مبارك عليكم الشهر ,,

والله يعيده علينا وعليكم بالخير والبركه ,,

هالمتصفح ان شاء الله بيكون عبارة عن يوميات صائم ,,

يعني كل يوم راح نستضيف عدد من الاعضاء/هـ ويتكلموا لنا عن ايامهم المباركه في هذا الشهر باذنه ..

ونتمنى مايجي احد من الاعضاء ويقول انا اعتذر عن المقابله او االاستضافه ,,

الهدف منها اننا نتعرف عليك عن كثب وعن قرب في هذا الشهر الفضيل سوواء ً بالعادات والتقاليد او طرق الافطار

والسحور او طرق تجمع العوائل في هذا الشهروكذلك نعرف كيف كانت بدايتك بالصيام من الصغر واطرف المواقف واصعبها واحرجها ..

نتمنى ان الموضوع يلاقي استحسان الجميع ,,

شاكر للجميع .. !

ضيوفنا لهذا اليوم كلا من

1_ المشرفه / رغـــــــــــــــــــــــد

2_عــــبــد الرحــــــــمـــــــن الــدوســــــــــــي

3_ الاخت/ طــــــيـــــــــــف


تقبلوا احترامي

الصــــغــــــيــــر1

ـــــــــــــــــــــــــــــــــــــ

[عبدالرحمن الدوسى]

كل عام والجميع بالف خير

تحياتي ابو وليد حقيقه تفاجئت عند طلبك استضافتي لكن طالما هذه رغبتك لك ذلك:

بداياتي مع رمضان كانت في سن الخامسه عشر تقريبآ متأخره شويه لظروف الزمان والمكان

برنامجي اليومي يبدآ من بعد الساعه الحاديه عشر والنصف بالذهاب الى الدوام الرسمي حتى الساعه الثالثه ثم تصفح جهاز الجوال وقراءة

الرسائل الوارده وماذا تحمل بداخلها من الطلبات المنزليه طبعآ كل يوم تطلع بطبخه وتحتاج لطلبات جديده ما ارتاح من هذه الطلبات الا اذا

قلت لهم الفطوراليوم في المطعم ومن ثم يدخل موعد صلاة العصر وبعد الصلاه اخلد الى النوم حتى قبل الافطار بنصف ساعه ما اخرج من المنزل

الا لشراء السوبيا الافطار مع العائله ثم متابعه طاش وبيني وبينك صلاة العشاء بعد ذلك تناول بعض الماكولات والذهاب الى ملعب

الدوره والعوده الى المنزل الساعه الثانيه ليلآ احرص على متابعة العربيه والجزيره حتى موعد تناول السحور ومن ثم شرب الشاى

والجلوس مع الاولاد حتى موعد صلاة الفجر ومن بعدها الخلود الى النوم ........

[&طيف&]

السلام عليكم


أشكرك أخي الصغير على استضافتي

وأعذروني على سوء التعبير



عندما وصلت للصف الثاني الإبتدائي بدأت الصوم في يومي الخميس والجمعه فقط لأن باقي الايام مدرسه

وفي الصف الثالث التزمت بالصيام والحمدلله


أما بالنسبه لنظامي في رمضان أستيقظ لصلاة الظهر لأصلي وأنام ثم أستيقظ العصر أصلي وأذهب للمطبخ

وأنهي أشغالي على الساعه السادسه وأذهب لغرفتي أقرأ القرآن ثم أذكار المساء ثم أذهب إلى الصاله لنستعد

للجلوس على سفرة الفطور الأولى وهي عباره عن الرطب والشريك والدقه واللبن والقهوه والعصيرات فقط

ونضع القناة الثانية وننتظر أذان الحرم ونفطر

أذهب أصلي المغرب وبعد الصلاه بساعه إلا ربع نضع الفطور الثاني ومن أساسياته الشوربه والسمبوسه أو البف

وبعض الأطباق المنوعه والحلا

هذا بجانب مشاهدة طاش ما طاش

ثم أذهب لغرفتي لأصلي العشاء والتراويح وإذا عندي خرجه زياره أو سوق أخرج بعدها

أو أفتح جهازي وأتصفح بعض المواقع المشاركه فيها

ونجلس إلى الفجر أصلي ثم أجلس أقرأ إلى طلوع الشمس وأنام



ونصيحتي للجميع الصلالالالالالاه لاحظت ان الأغلبيه ينامون عن الصلاه

لا تفوتوا التراويح والدعاء في هذه الأيام المباركة


اللهم اغفر للمسلمين والمسلمات الأحياء منهم والأموات اللهم ارزقنا الجنة وحسن الخاتمه اللهم آمين


لا تنسونا من دعوه في ظهر الغيب

[رغدة]

عذرآ على التأخير ..!!
يسعدني اطل عليكم من خلال هالموضوع المميز ..
وشكرآ لمشرفنا الصغير ان عطآني هالفرصة

بدأت الصيآم ونا في رابعة ابتدائي .. و ما يحتاج اقول كيف كان .. تخبرون صيام الـ ( بزارين )
امي كانت تقول صومي لبعد الظهر وتعالي المطبخ .. قد اني جهزت التطلي لك ( مدري كيف كنت احبه يارب لك الحمد )

اذكر مرة سويت نفسي فيها اني مارة صايمة ولا تشوفون الا السواك في فمي و والمسبحة في يدي .. وتركت بابا فرحان وحطيت على اذاعة القران وقلت لامي (لا لا ما ابغى تطلي .. صايمة الله يجزاك خير) ... يعنني عايشه جو وصايمة طول اليوم
قبل صلاة المغرب بساعة او ساعة الا ربع ، نادوني تعالي شيلي الاطباق وديها على السفرة
من المطبخ للغرفة سيب .. والله طول ذاك السيب مره سمبوسة ومرة شفطة من جك الفيمتو .. ومرة جغمة مويه
الى الان ما عرفت وش سر هالهبقة ..؟؟

المهم خلوناا في الوقت الحالي
بما اني انثى فطبيعي يومي بيكون مشغول .. >> دقة
بعد ما افطر .. اجلس مع العيلة الى ما يجي الوقت اللي افز فيه طولي عشان اقوم اخلص اللي علي في المطبخ وانظف المأساة اللي تصير بعد الافطار في المواعين والسفرة ..
بالعادة اخلص قرب صلاة العشاء وبكذا تكون خفارتي للمطبخ انتهت وقد اني سلمتها لغيري الى الظهر.. وابدأ ازن واترجى احد يوديني المسجد اللي بعيد عن بيتنا اصلي التروايح لان المسجد اللي في حينا معد ينراح فيه من رجة الاطفال
اذا لقيت من يوديني كان بها ..
وان ما لقيت فرشت السجادة وصليت كم ركعة في البيت ولكم مني ذيك الساعة الابتسامة شاقة الوجة والاعصآب مرتآحة والنفسية مآفي مثلهآ
اتصفح النت الى ما يجي اللي يجي من المسجد .. وجلسنا على الشاي الاخضر .. شوية و اقراء من القران الى ما يجيني النوم وادقها نوووومة الى السحور .. باذان الفجر اقعد في غرفتي احاول استغل من خير هالشهر
وارجع ع النت .. وانآم من الطفش الى الظهر بحدود ساعتين الى ثلاث ساعات .. ودووووغري ع المطبخ على ان نخلص الطبيخ والنفيخ وتكون السفره جاهزة وكل اهل البيت جالس قبل صلاة المغرب بـ ربع ساعة نتحرى ساعة الاجابة ..
وهكذا دواليك ..

من المواقف اللي صارت في رمضان
سافرنا الديرة .. وسكنا في ( قلوة ) بجنب جامع يمكن يعرفونه سكان قلوة
رغم انه صغير على قد الحال .. لكن فيه مكان مخصص للنساء ما يفصل بين الرجال والنساء الا ( ستارة )
ومن اللي يحضرون للصلاة يوميآ ماشاء الله ولا يفوت ولا ركعة ، واحد مسكين لكم عليه .. صار له حادث وراح فيها عقله
(كانوا اثنين لكن واحد منهم مسكين توفي .. وبقي الثاني )
ويالطيف صاروا الناس يكرهون يرحون هذاك المسجد لانهم يشوشون على المصلين
اجتمعنا بنات الاقارب واتفقنا نروح نصلي التروايح .. يوم وصل الخبر لابوي شال هم
قال لازم نروح لذاك المسجد وهو يحك راسه .. قلنا ايه .. قال ملزمات ..؟؟ .. قالنا ايه .. قال الله يعين ..
الموهيم ..
قام الامام يقوّم الصلاة ونشب له خوينا بزيادة ذاك اليوم كل ما قرأ شي قرأ معه بصوت عالي
لدرجة يخلي الامام يخربط حتى في الفاتحة
الامام صبر عليه الى ما طفش منه.. صرت احسالود وده يدفه من الباب ويقفله وراه عشان لا يفكر يدخل
اللي ضحكني في اواخر الركعات صار الامام معد يخليه يكمل كلمة وحدة
الادمي يقول بصوت عالي الحمد لله ( يبي الفاتحة يعني ) والا الامام قبل ما يكمل ذاك يقول الله اكبر
الادمي يقول سبحان ربي العظيم ، سبحـ.. والا الامام قال سمع الله لمن حمده
الادمي يقول سمع اللهـ .. قال الامام الله اكبر
خوينا حاست اموره .. معد قدر يضبط وضعه مع الامام ... الله يعافيه مسكين

هذي يومياتي ... ولا تنسونا من الدعاء

[الصغير1]

اقتباس: المشاركة الأصلية كتبت بواسطة عبدالرحمن الدوسى      كل عام والجميع بالف خير تحياتي ابو وليد حقيقه تفاجئت عند طلبك استضافتي لكن طالما هذه رغبتك لك ذلك: ........

اهاااااا
الا تعال قلي ليش ماقلت سالفت علبة التونه الي زرفتها بنهار رمضان من دكان البصيلي واكلتها!!!
هههههههههه
طيب اقل شيء كان خبرتنا بسالفت<<<< ولا خلاص تراني صايم

[الصغير1]

اقتباس: المشاركة الأصلية كتبت بواسطة &طيف&      السلام عليكم للجلوس على سفرة الفطور الأولى وهي عباره عن الرطب والشريك والدقه واللبن والقهوه والعصيرات فقط لا تنسونا من دعوه في ظهر الغيب

ياليت توضحين لنا ماخط بالاحمر والله اسماء غريبه !!!
اكيد من الغربيه

[صـدى زهـران]

أتحفتمونا بيومياتكم الرائعة
كل الشكر لكم جميعاً ..

الصغير1

ننتظر ضيوف اليوم وأتمنى
أن تكون الاستضافة
هكذا ( الهيثم07 , الفقار , الســرف )

[الصغير1]

اقتباس: المشاركة الأصلية كتبت بواسطة رغدة      عذرآ على التأخير ..!! .. تخبرون صيام الـ ( بزارين ) امي كانت تقول صومي لبعد الظهر وتعالي المطبخ .. قد اني جهزت التطلي لك ( مدري كيف كنت احبه يارب لك الحمد ) اذكر مرة سويت نفسي فيها اني مارة صايمة ولا تشوفون الا السواك في فمي و والمسبحة في يدي .. وتركت بابا فرحان وحطيت على اذاعة القران وقلت لامي (لا لا ما ابغى تطلي .. صايمة الله يجزاك خير) ... يعنني عايشه جو وصايمة طول اليوم قبل صلاة المغرب بساعة او ساعة الا ربع ، نادوني تعالي شيلي الاطباق وديها على السفرة من المطبخ للغرفة سيب .. والله طول ذاك السيب مره سمبوسة ومرة شفطة من جك الفيمتو .. ومرة جغمة مويه الى الان ما عرفت وش سر هالهبقة ..؟؟ وبكذا تكون خفارتي للمطبخ انتهت وقد اني سلمتها لغيري الى الظهر.. وان ما لقيت فرشت السجادة وصليت كم ركعة في البيت ولكم مني ذيك الساعة الابتسامة شاقة الوجة والاعصآب مرتآحة والنفسية مآفي مثلهآ هذي يومياتي ... ولا تنسونا من الدعاء

رغد

ما عليش تصدقين بطني يالمني من كثرة الضحك لاحظي ماخط بالاحمر
تطلي__بزارين__ السواك __السبحه___ احلا شيء جغمه الله يرج شيطانك رجا

عاد صدقي ممكن تفوزين بجائزة احسن مقابله
ههههههههههههههههه خفاره هاه >>>>> راقت لي كثيرا بس بجد يالطيف مسكين الي يستلم منك الخفاره
شكرا للجميع