سوالف مواطن

[الراس الصغير]

سوالف مواطن


منقول للترفيه فقط لاغير


يقولك صاحب القصه يوم من الايام قاعد ادور بسيارتي الكابرس 79
وادور احد من العيال امره ابي ادور لي سلف 10 اعبي بنزين
خشيت شارع كان مقطوع يصلحون فيه يقالي ابختصر

سمعت صوت غريب
ناظرت بالمراية الا واشوف وراي منظر ولاالافلام الامريكية

سيارة لومينا بيضاء داعسه ووراها 3 دوريات
ووراها 3 سيارات حكوووووومة داعسة وانواع المطاردات


انا قلت ياولد مايبيلها
لازم يظهر الجانب الوطني
وادعس للكابرس وراهم
راعي اللومينا كان سواق وشكله فنان ومتعود على هالحركات

اما حقين الدوريات فمساكين تلقاهم داعسين واذا جت لفة انواع الفرامل حتى ان واحد منهم قشع صندوق زبالة دخله بقالة على الطريق

انا بدا الحس الوطني عندي يشتغل
وجاني احساس الافلام الامريكية
وادعس



دعست وراهم



راعي اللومينا شافني وصار وجهه كذا
وادعس وراه



شوي الا والف عليه خششته في محل خياطة نسائي



طبعا انا نزلت بسرعة واطب عليه وافتح الباب واكتفه واصارخ للشرطة تعالوا
تعالوا

تعالـ ....



واناظر الا الشخص الي انا ماسكه داخل اللومينا لابس بدلة عسكرية
وشوي الا وستة من الافراد الي في سيارات الشرطة واقفين جنبنا والضابط الي معهم يقول لي :
خير ؟؟
وش فيك ؟؟



قلت له : وشو الي خير ؟؟
انا فازع لكم وصايد هالحرامي .......


قال الضابط : ومن قال لك افزع والا الحقنا ؟؟


قلت له : الحين انتوا مو تطاردون هالحرامي ؟؟


قال : اي حرامي ؟؟
هذا تدريب لمكافحة المخدرات على المطاردة والشغل كله كان تكتيكي ووهمي ..


خش عسكري ثاني وقال : ياطويل العمر شكله سكران .. ناخذه ونحلل له ؟؟


ويتلوني للقسم وانواع التحويل والتحليلات ..


اخر شي قالوا تراك بتتحمل اصلاح السيارة الي صدمتها


وبعد حب خشوم تركوني اطلع وقالوا لي : لاتتعودها






من يومها حرمت ...



بلا وطنية بلا اناشيد





مرت 3 شهور على هالسالفة ...




وفي يوم طالع انا ومجموعة من الشباب الاستراحة ...



كنا مستانسين نسبح ..


شوي اطلع على سور الاستراحة مسوي ابطب للمسبح محيفرة <<<< قدييييييييييم

الا واشوف شي غريب ...

الاستراحة الي جنبنا فيها شي غريب ..


ورعين اعمارهم على 12 يسبحون واشوف واحد منهم يغرق ...

والثاني شافني ويقول الحق اخوي بيموت تكفى بسرعة ..



انا ساعتها تذكرت الي انقذوا عوايل في السيول الي صارت ببعض المناطق
وكيف ان الملك كافئهم ..


قلت انا بس ..

جاك الرزق ياولد



واطب يم استراحتهم
ومباشرة على المسبح وانا اتخيل الملك يقول ياولد مش واضح شكلي ابقشع مدير الدفاع المدني وابعينك مكانه



وصلت المسبح الا شي غريب ...



الولد الي كان يغرق طلع بسهولة وقاعد يضحك ..

اما اخوه الثاني فقعد يصارخ : ابووووووووووووووووووي تعال شف حرامي

وبدت الحريم تصارخ ...


شوي الا 4 كبار جوني وخذ ياطق ...

والشايب يقول : تتعدى على محارمنا في الاستراحة ...



وشوي الا وحنا في قسم الشرطة وانا كاشخ بسروال السباحة ...




انجلدت لين شفت الله حق



وتعهد وضربوني الباب








حرمت انا اسوي اي شي ..........









بعد هالموضوع بسنة رحت للسوق الصبح ماسكه معي ابي اشتري فنيلة علاقي













شوي الا ........


4 شباب خوال يجونك طايرين وواحد منهم يسحب شنطت بنت بقوة لدرجة ان البنت بنطت ماردها الا برميل زبالة

عاد انا قلت بس ..


وقتك ياروبن هود


وافصخ زبيريتي واعطيها هندي قلت له تراها عهدتك لين ارجع




وادعس وراهم




يخشون شارع وراهم




يخشون حارة وراهم





اخر شي قفلت معهم ووقفوا


التفتوا لي وقال واحد منهم : وش تبي تلاحقنا ياسوبرمان ؟؟ مسوي منقذ ..



وجلدوني جلد ....


جلد اكلوني معه نص تراب الشارع



خذوا جوالي وفتشوا بوكي لقوا 7 ريال خذوها ورموا علي البوك وماخلوا فيه الا صورة سميرة توفيق راز بها <<<<<<< العن ابو ذوقك ياشيخ



رجعت للسوق وحالتي حالة



لقيت الشرطة والعالم متجمعين على البنت ياخذون اقوالها


وماامداها تشوفني الا وصاحت ..


هذا معهم

هذا كان يراقبني قبل يسرقون الشنطة
وشفته ينحاش معهم



توني ابقول : ياجماعة انا مالـ ...

الا بوكس شايل اربعة ضروس من خشتي ..
وبركبة ركبوني الجيب وعلى قسم الشرطة .....



انجلدت كالعادة وبعد 3 ايام في التوقيف طلعت






اخر الاحداث ..

قبل ثلاثة ايام مار انا وواحد من العيال من شارع رئيسي ...

كان الوقت الساعة 2 الليل برمضان طبعا

الشارع كان مظلم
وفيه اثنين تصادموا


كان واحد منهم ينافخ على الي صدمة والعالم تبي تفكهم


شوي الا واحد يقول لي : شف شكل السيارة بتشب
طبعا يقصد السيارة المصدومة


قلت له : وش الحل ؟


قال : يبيله واحد يفك البطارية




كانت السيارة تدخن




واجيك انا سوبر مان
واركب سيارة الرجال ...



وابي افتح الكبوت الا الظاهر انه كان عالق شوي




وبدون ماادري جت يدي بالغلط على القير حق السيارة وانا نازل



شوي الا السيارة تدحدر وتقشع 4 سيارات واقفات



المشكلة هالشي صار على وصول المرور




كلبشوني
وع الحجز




يبوني ادفع تكاليف اصلاح السيارات
وانا كل ذنبي اني كنت مسوي ابساعد
وافزع
ومسوي وطني






بذمتكم الواحد مو يغسل يده من انه يسوي خير ؟؟

والا انا اللي مقرود ؟؟


والا وش القصة
خخخخخخخخ منحوس ومقرود من جد وجد ومن زرع حصد

[كاتم الاحزان]

ترا ما قريت ولا حرف


مافي ملخص للقصه ^_^

[سالم الدوسي]

وشوي الا وحنا في قسم الشرطة وانا كاشخ بسروال السباحة ...
ابوخالد
مقرود ..... مقرود .. ما فيها كلام

[زهراني من الرياض]

ههههههههههههههههههههههههههه

حبيبي لا منحوس ولا مقرود .. << اجل وش .!

الناس هي اللي ماعاد فيها خير وماتقدر وطنيتك وفزعتك ..

وبصراحه مادري وش اقولك .. اخاف اقول استمر.. وتبلش بعمرك.. واخاف اقول طنش.. ثم الناس هي الل بتبتلش..

[بن جعدان]

يااااااااااااااااااااااااااه تصدق كنا ندرس عن اهل الخير اللي يتعرضون لالوان التجريح ويلقون اللوم عليهم زمااااااااان في المدرسة

ياخي تعال عندي وخلني االف لك كتاب اسمه( لجلك ياوطن...! )

ونكتب فيه بطولاتك وتاريخك


يانفداك ياالحبيب والله انك على نياتك حزنتني القصة كثير ياحليلك


كل عام وانت بخير يابطل


والى الامام يابطل سيروا وقلوبنا معكم


اما بختك مايل او ان بختك مايل

[شذى الريحان]

ههههههههههه ياحرام
هذااا جزاء اللي يفزع ويقدم خدمة بلووشي خخخخخخخخخ
من تدخل في مالايعنيه لقي مالايرضيه

الله يكتب له الاجر
موضوع طريف
اطيب تحياتي

[محمد الساهر]

اقولك يا الحبيب ريح رأسك وأقعد في بيتكم لكي تريح وترتاح

لأن شكلك راعي مشاكل يا الراس الصغير وانا اقول ويش في البنات في المنتدى مسوين عليك حرب عالميه ثالثه أثارهم ما ينلامون..

وأحنا واقفين معاك على بالنا انك مظلوم

ياما تحت السواهي دواهي..

ههههههههههههههههه

[الراس الصغير]

اقتباس: المشاركة الأصلية كتبت بواسطة كاتم الاحزان      ترا ما قريت ولا حرف مافي ملخص للقصه ^_^

اهلا بتواجدك هنا يكفي انك رفعت الموضوع الى الاعلى

ملخص القصه ان هناك في القصه شخص حضه مقرود وبس

يسلمووووووووووو

[الراس الصغير]

اقتباس: المشاركة الأصلية كتبت بواسطة سالم الدوسي      وشوي الا وحنا في قسم الشرطة وانا كاشخ بسروال السباحة ... ابوخالد مقرود ..... مقرود .. ما فيها كلام

شكرا لتعليقك ياعزيزي

[الراس الصغير]

اقتباس: المشاركة الأصلية كتبت بواسطة زهراني من الرياض      ههههههههههههههههههههههههههه حبيبي لا منحوس ولا مقرود .. << اجل وش .! الناس هي اللي ماعاد فيها خير وماتقدر وطنيتك وفزعتك .. وبصراحه مادري وش اقولك .. اخاف اقول استمر.. وتبلش بعمرك.. واخاف اقول طنش.. ثم الناس هي الل بتبتلش..

ياعزيزي هذا الموضوع منقول ولست انا خخخخخخ

منقول منقول منقول وليس لي علاقه بتاتا البته في القصه
انا بس نقلتها لكم هنا للترفيه فقط لاغير

شكرا للمرور والشرطه