( من نظمي ) يا ليلي اللي صابني منك وسواس

[الشغموم]

( من نظمي )

يا ليلي اللي صابني منك وسواس
ما غير اسولف لك عن امفارَق الزين
إصبر عساي افرّغ الهم والياس
همٍ عليْ اكبر من الهند و الصين
حصرتني في ظلمة ٍ ما بها ناس
مابْصر بها يا كود لمع الميازين
حرمتني يا ليل من حلو الالعاس
حلو ٍ سكن في حبة القلب و العين
حلو انخلق من طين لكنه الماس
يا ناس كيف الماس مخلوق من طين
حلو ٍ لفا و عروق الاحساس يبّاس
في الاوردة ضخ الدما و الشرايين
و ارسل هماليله على قاع الاطراس
حتى انفرش له بالنفل و الرياحين
ليت القصايد بالوصل ترفع الراس
من شان اجمل فيه خمسة دواوين
تعجز مقاديمي على قطع الارماس
دونه سباريت الخلا و السراحين
يا ليتني مثل اشقر الريش قرناس
اكفخ و اعلّي وآصله لو بعد حين
أو ليت عندي للوغى الدرع و الطاس
و السيف الاشهب و الرماح المسانين
و اذبح عراقيل ٍ على الباب حرّاس
يا ما حدوني عن ملاقاته سنين
اتعبت انا التفكير واتعبت الاخماس
في لمحة العاشق اتشوف النياشين
صبغ الحزن في نظرتي ماله قياس
يامدور المضمون بَـد العناوين
جفني جفاه النوم ما غض بانعاس
و اسقيت من فيض الدموع البساتين
و ابحرت في هاك المناعيس غطاس
نجل العيون السود ما تعرف اللين
حبل الجدا بالعين مـا لِحْق الانفاس
ميت انا و من حولي الناس حيّين
ميت يِوِن و ينسمع فوق الارماس
ونّة صويب الحب تبهر ملايين ،،،

[احمد صعمود]

عذوبه وثقافه وتراكيب جميله يالشغموم

صح لسانك وسلم راسك لاعدمناك

وكل عام وانت بخير

.

[مخاوي الجود]

صح لسانك يابن العم ... والله يجيرك من الوسواس ...
قصيده جزله ... لاهنت يالغالي ...



أخوك/ أحمد بن عبدالله البشيري