كلنا مهمين جدا ... واكثر

[العرنين]

بسم الله الرحمن الرحيم
السلام عليكم ورحمة الله وبركاته

.
اكيد ان اغلبكم سافروا بطيارات الخطوط السعوديه ومروا على اكثر من مطار
داخلي وبالاخص مطارات الرياض وجده والدمام
كم مره تكررت معكم هذي المناظر
من اول ما يعلنون موعد صعود الطائره تلقا العالم تتناقز على البوابه
تقول انهم في سباق على المقاعد ، المصيبه والله انهم يدرون ان كل واحد معه
بطاقة الصعود وعليها رقم المقعد حقه يعني على ايش المسابقه ما ادري
ناسي انه بينلطع اقل شي نص ساعه الين تقلع الطياره وبدون مكيف
بحكم ان خطوطنا حفظها الله ما تشتغل مكيفتها الا اذا اقلعت
واذا كان في مطار الرياض ودخل في نفق الصعود او في مطار جده وركب الباص
تلقاه يسحب شنطته و يكلم بجواله
اسمع معي وش المكالمات
... الحين انا بادخل الطياره
يقفل ويدق على واحد ثاني
... ترى الحين بادخل الطياره
يقفل ويدق على واحد ثالث
... اقسم بالله اني بادخل الطياره الحين
تصيبك حاله من الهلع تقول وش مخطط عليه هذا الادمي الله يستر
وبعد ما يدخل الطياره يسحب بشنطته تقول فيها اموال قارون خايف لا يحطها مع العفش
تلقاه ساد الممر عشان يدحش الشنطه في الادراج اللي فوق والعالم طوابير وراه
واذا قدر الله وسارت الامور على ما يرام ودخلت شنطته في الدرج
يجلس على الكرسي ويدق على خويه الاول
... تراني في الطياره الحين
يقفل ويدق على خويه الثاني
... يا اخي وش تبغى تراني في الطياره الحين
يقفل ويدق على خويه الثالث
... اقسم بالله اني في الطياره وعلى المقعد
اللهم طولك يا روح
بعد ما تقلع الطياره وتجي الجرايد ياخذ جريدتين ولا يقرا منها ولا وحده
الا بالعكس تلقاه يطالع في جريدة اللي جنبه
و بعد ما تنطفي اشارة ربط الاحزمه تلقاه اول واحد ينقز يدور بالممرات يتميلح
واول ما يدري انهم جابوا الوجبه يجيك يطامر يبغى يلحق لا يفوته المفطح
...
وبعد الوصول
اول ما تنزل كفرات الطياره في المطار
يفتح جواله ويكلم خويه الاول
... ترى وصلت
ويقفل ويدق على خويه الثانيه
... تراني وصلت الحين
ويقفل ويدق على خويه الثالث
... اقسم بالله اني وصلت وتوها نزلت الطياره حتى اسمع صوت الكفرات
يا الله وش تبغى الحين مستعجل << ما ادر من اللي دق على الثاني
وبسم الله يبدا مشوار جديد
تلقاه والطياره باقي تمشي على المدرج متعلق يسحب في شنطته من الدرج
وبعدها تلقا طابور طويل من السعوديين واقفين من الباب الى اخر الطياره
ينتظرون فتح الباب للهجوم على السلالم كل هذا والطياره باقي ما وقفت
وفي صالة العفش حدث ولا حرج
تلقاهم ناقزين فوق السير واللي يدفدف بالعربيه واللي ياخذ شنطة غيره
كانه ما اعطوه رقم يوم حط العفش اول مره
والا تلقاه هو بزارينه يتصايحون هذي هذي شنطتنا
لا لا ماهي هذي
هذيك هي شنطتنا اللي عليها X
والله اني طفشت حتى من كتابة الموضوع وانا اتذكر المناظر
...
اسئله
هل كلنا مهمين لهذي الدرجه ؟
ليش دايم احنا مستعجلين ؟
...
دمتم في حفظ الله

[الهيثم 07]

صدقت أخي يحضرني موقف في مطار الطائف الرحله كانت الطائف الرياض الدمام
ومزدحمه جداًوكان أحد المسافرين الانتضار حالفه الحظ بالصعود ومن كثرة الفرح..
يجري مع الساحه بكل ما أعطي من قوة..حتى انه صعد السلم أمسك به الملاح 0
وقال أنتظر ومن غظبه نزل فأوقع أحد الركاب الاوبه على الارض
مرمي بعد التشخيصه أصبح عامل نظافة ولاحول له ولا قوة
فجزاك الله خير الانسان خلق هلوع0
وعدم الوعي بالناس كما ذكرت ارقام المـــــــــــقاعد
تحـــــــــــدد الركاب بمواقعهم
والمهم واكثر تقول أنهم في مقهى بالا تصال ..
نتمنى أن يكون فيه وعي أكثر لدي الجميع من العامة
موضوعك هادف ومفيد نتمنى أن يطلع عليه أكبر عددممكن
الله يوفقك
تقبل تواجدي بود - أخي العرنيين

[$وليف المربا$]

موضوع هادف اخي العزيزاذاكان البعض عندالتماس يقول سرعه سرعه يعني العامل احر من الجمر
هاذي طبيعه في اغلب البشريحبون العجله

تقبل احترامي

[الفقار]

القضية ليست في المطارات فقط أو الطائرات
البعض يتعامل مع التقنية بطريقة غريبه والبعض ربما يوهم الآخرين للفت الانتباه أنه يتحدث وهو لا يفعل

نحن في أزمة مرض منذ ظهور البيجر حتى الآن
طبعا هذا يرجع لمستوى الوعي والثقافة الشخصية

ألعرنين : سررت لمتابعة ثاني موضوعاتك
لك الشكر

[أميـــرة زهران]

يمكن بعضهم اول مرة يسافر

[خليل الحريري]

الله يعطيك العافيه أخوي الغالي : العرنين
موضوع في الصميم وللآسف هذا هو واقعنا نحن السعوديين

( شطحه )
الشعب السعودي سمعت انه بأذن الله رح يتطور .. بعد 100 سنه ضوئيه ..
وليس فقط السعوديون بل جميع العرب ,,
لاننـا فعلاً متأخرين من نواحي كثيره .. يشملها الفكر - التكنلوجيا - السلوك ... الخ
مع ان ديننـا الاسلامي .. يحثنا على حسن التعامل والتصرف مع الغير ,, ولكن لا حياة لمن تنادي

أخوي الغالي / العرنين لا تحرمنا من مواضيعك الجميلة نحن فانتظارك ..
أخوك : خليل الحريري

[ســـمـــا F4]

مشاهد متكرره في كل مره اروح فيها المطار
من جد الوضع مزري بشكل كبير
متى الناس يتصرفون برقي في اماكن مثل هاذي !
مشكــــوـوـوـوراخي العرنين مشكــــوـوـوـور

[جبل منور]

واقع تعودنا عليه واصبحنا نتوارثه من جيل الى جيل

يعطيك العافيه العرنين على المواضيع الممزوجه من واقعنا

لك ارق التحايا واعطرها

[العندليب]

حدث ولا حرج ..
تبغاني أحكيلك قصة الشنطه اللي طاحت فوق راسي ..

انا ما أدري ليه مايمنعون دخول المرفقات الكبير داخل الطائره ..

الإستعجال دون إستخدام العقل هو غالباً مايُحدث هذا ..

الف شكر أبو وتين ,,

[بعيدة المدى]

وحدث ولاحرج مع البزارين الى في الطياااااااارة
ما ادرى وش دور الاهل مايعلمونهم الأخلاق ولكل مكان أحترامه
ولكن محد يلومهم إذا الاهل مايعرفون إن لكل مقام مقال ......
كيف الاولاد الصغار........